Toe foki ‘a Fakatele Faletau ki he RTA

KUO to e fakafoki hake ‘a Fakatele Faletau mei he Kautaha Air Polynesia ki he Kautaha Royal Tongan Airlines.

Na'e mâlôlô foki ‘a Fakatele mei he Royal Tongan ‘o ne hoko ai ko e Pule fo'ou ia ‘o e Kautaha Polynesian Airlines ‘i he ta'u 2001 ‘o fetongi ‘a Paul Kalarus.

Ko e fakafoki hake ‘eni ‘o Fakatele ki he tafa'aki mâketi´ ‘i he taumu'a ke ne tokoni ki hono fakalakalaka'i ‘o e kautaha´ni.

‘I he foki ko ‘eni ‘a Fakatele ki he Royal Tongan ‘oku le'ole'o ai ‘a Molisoni ‘Otukolo ‘i he lakanga pule´ ‘i he Kautaha Polynesian Airlines.

Kuo kamata foki e fepuna'aki ‘a e Royal Tongan ki Honolulu´ ‘a ia ko e konga fo'ou ia ‘i he polokalama fepuna'aki ‘a e kautaha´ni pea ne foki mai ai ‘i he hengihengi Tokonaki kuo'osi´ ‘a e hâ'ele´ fakataha mo e Palêmia´, Pilinisi ‘Ulukâlala Lavaka Ata.

Kuo fokotu'u foki mo ha Komisiona ‘o ‘iloa ko e Royal Commission kenau fakahoko ha ngâue ki hono tu'uaki atu ‘o e kautaha´ni ki muli´ pea mo e ngaahi ngâue fakalakalaka ma'a e kautaha´. ‘Oku kau heni ‘a e polokalama ‘a'ahi takai ki ‘Aositelêlia, Nu'u Sila, Hawaii mo ‘Amelika ‘o tu'uaki atu ai ‘a e kautaha´ni ki he kakai Tonga´.