'Inivesi 'a e kautaha TCC 'i he RTA
Fa'u 'e Laucala Pôhiva

NUKU'ALOFA: KUO laka hake 'i he 3 miliona´ 'a e pa'anga kuo nô hokohoko 'e he Kautaha Royal Tongan mei he Kautaha Fetu'utaki 'a Tonga , TCC 'i he ta'u kuo'osi´ pê ke tokoni ki hono 'utu 'o e vaka´ mo e ngaahi fakamole kehe 'a e kautaha´.

Ko e pa'anga ko 'eni´ 'i he lau 'a e Kautaha Fetu'utaki 'a Tonga´ ko 'enau 'inivesi pê ia 'i he Kautaha Royal Tongan.

Ko e Palêmia´, Pilinisi 'Ulukâlala Lavaka Ata ' oku Sea 'i he Poate 'a e TCC pea ko e toe Sea pê ia 'a e Poate Royal Tongan.

Kaekehe, fakatatau ki he fakamatala 'a ha tokotaha falala'anga ka 'oku 'ikai te ne loto ke fakahâ hono hingoa´ ko e nô ko 'eni 'a e Kautaha Royal Tongan mei he TCC 'e toki totongi fakafoki ia 'i ha ma'u ha tupu ka 'oku te'eki ke fakapapau'i pê 'e ma'u 'a fê 'a e tupu ko ia´.

Ko e fepuna'aki ko ia ki Hawaii fakatatau ki he fakamatala´ he'ikai pê ke ne lava 'e ia 'o tâpuni 'a e fakamole faka'aho 'o e fo'i puna 'e taha.

"Talu e kamata fepuna'aki 'a e kautaha´ni ki Hawaii 'oku te'eki ke a'u ia ki ha tu'unga fakafiemâlie pea kapau ko e me'a ê 'oku hoko 'i he taimi tokolahitaha 'o e fepuna'aki´ 'oku 'ikai ha 'amanaki lelei ia ki he taimi 'e holo ai e fepuna'aki 'a e kakai´ 'o hangê ko ia 'oku tau 'unu atu ki ai´," ko e fakamatala ia 'a e tokotaha´ni.

Kuo fakapapau'i foki 'e he Pule Lahi´, Loggan Appu 'oku 'i ai pê 'a e silini ia 'a e kautaha´ ke fakalele'aki pea 'e hokohoko atu pê ia.

Lolotonga 'eni´ kuo ne 'osi fakahâ 'e ia ki he kau mêmipa 'o e Fale Alea´ 'i he ta'u kuo'osi´ 'oku fiema'u 'e he kautaha´ ia ha pa'anga laka hake 'i he 10 miliona´ ke fakalele 'aki ka e 'oua kuo a'u ki he 2008 'a ia ko e ta'u ia 'oku ne fakapapau'i 'e ma'u ai 'a e tupu´ ka e 'osi 'a hono ta'u ngâue´ ia 'o'ona 'i he 2007.

'I he taimi tatau kuo laka hake 'a e fakamole ia 'a e pule'anga´ 'i he kautaha´ni 'i he ta'u fakapa'anga 'o e 2002 ki he 2003 'i he 10 miliona´ pea 'oku 'i ai e tui he'ikai ko 'ene ngata ê 'a e tokoni 'a e pule'anga´ he 'oku to e fiema'u 'a e 10 miliona tupu ia ke hokohoko atu 'aki 'a hono fakalele 'o e kautaha´ni ka e toki a'u ki ha taimi 'e ma'u tokua ai ha tupu.

"Ko e ngaahi halanga vaka kotoa 'oku fepuna'aki ai 'a e Royal Tongan, 'a Nu'u Sila, 'Aositelêlia mo Hawaii he'ikai te ne lava 'e ia 'o feau 'a e ngaahi fakamole´ kotoa he ko e me'a ke mahino´ ko e mâketi 'oku tau va'inga ai mo e ngaahi kautaha vakapuna kehe´ 'oku si'isi'i pea 'oku 'ikai fenâpasi lelei 'a e Takimamata´ ia mo e kautaha´ni ke hangê ko Fisi´ ke lahi e kau folau'eve'eva´ 'i he lolotonga e taimi 'oku si'i ai e fepuna'aki hotau kâinga´. ''I he'ene pehê he'ikai lava 'e he ki'i pa'anga 'oku ma'u ai´ 'o tâ fakafoki e $1 miliona 'i he mâhina ki hono lisi mai 'o e vaka´ni 'o 'ikai lau ki ai mo e ngaahi fakamole lau kilu 'i he uike ki he vahe mo e 'utu 'o e vaka´ mo e hâ fua e ngaahi fakamole 'a e kautaha´," ko e fakamatala ia 'a e tokotaha´ni.

Kuo laka hake foki 'i he ta'u 'e 10 'a e faifatongia 'a e kautaha´ni mo e te'eki pê ke ma'u ha tupu.