|
Fai'aho lahitaha 'o e ta'u´ e ta'u 21 e 'ofefine 'o Liufau´
NUKU'ALOFA: NA'E fakahoko 'i he Tu'apulelulu 27 'o Tîsema´ 'a hono kâtoanga'i 'e he fâmili mo e Siasi Tôkaikolo 'ia Kalaisi´ 'a e hokosia 'e Mele 'Apoinita ki he Ngâue Tapu Saulala 'a hono ta'u 21.
Ko 'Apoinita´ ko e 'ofefine pê ia 'e tokotaha 'o e Palesiteni 'o e siasi´, Liufau Saulala mo Falamoni´pea ko e fika 4 ia 'i he fânau 'e toko 5.
Ko e fai'aho lahitaha 'eni kuo fakahoko 'i he ta'u kuo'osi´, 'a ia 'oku fakafuofua na'e laka 'i he 100 tupu 'a e pola na'e teuteu 'e he fâmili mo e kâinga lotu 'o e siasi´ 'i ' Amelika , Hawaii , 'Aositelêlia mo Nu'u Sila´. Na'e meimei ke takitaha mo e palepale 'i he keke 'aho 'a ia na'e 'i ai 'a e keke 'o e fâmili Tamai´, keke 'a e ngaahi fa'ê´ mo e keke 'a 'Amelika mo Hawaii . Ko e keke ko ia 'a e fâmili tamai´ na'e 'âtakai'i ia 'e ha ngaahi kapa pulu pauni 'e 6 'e 21.
Ko e ta'ahine fai'aho´ na'e fata mai ia ki hono tangutu'anga´ 'i ha nofo'anga kuo 'osi 'ufi'ufi koloa faka-Tonga mo koloa pâlangi pea mo hono kau muimui mo ha ngatu lau nima mo e koloa faka-Tonga kehe pê. Na'e 'ikai kau ki heni 'a e ngaahi me'a'ofa kehe 'a e fâmili´ mo e Siasi´.
Ko e koloa ki he ouau 'o e keke´ na'e kau ai 'a e fihu, ngatu launima, fala, ngaahi kato teu, ngaahi puha fa'o'anga vala mo e koloa pâlangi kehekehe. Na'e to e foaki mo ha taki $5,000 'a e ongo fakaafe fakalangilangi´, Fanetupou Vava'u Tuita mo Nikotimasi Vaha'i pea $10,000 na'e foaki ia ma'a e siasi´ ke fakamanatu 'aki 'a e hokosia 'e 'Apoinita 'a hono ta'u 21
|
