'Oku 'i fê toko 60 tupu ne ngâue 'i he Kautaha Tapaka?
Fa'u 'e Laucala Pôhiva

NUKU'ALOFA: KUO laka 'eni 'i he mâhina 'e 4 'a e 'ikai toe fakahoko ha ngâue 'i he Kautaha Ngaohi'anga Tapaka 'a Minsen Tsai 'i he Small Industries 'i Ma'ufanga´ hili pê ia 'a hono to e fakafoki 'o e koniteina tapaka 'a e kautaha´ ni mei he Uafu Kuini Sâlote´ ki Siaina 'i Sepitema 'o e ta'u kuo'osi´.

Na'e fakafoki 'a e koniteina ko 'eni´ 'i he tu'utu'uni pê 'a e pule 'o e kautaha´, Tsai koe'uhi´ he na'e 'ikai lava 'e he kautaha´ 'o totongi 'a e tute´ 'a ia na'e $2 kilu tupu. Ko e tute foki 'o e tapaka´ 'oku peseti ia 'e 500 tupu 'i he tu'utu'uni fo'ou ki he totongi tute´.

Kaekehe, na'e fakafoki ai heni 'a e koniteina ko 'eni´ pea ne 'ikai leva toe 'i ai ha ngâue ke fakahoko 'e he kau ngâue 'e toko 60 tupu na'e fakangâue'i 'e he kautaha´ ni pea ne fai leva 'a e tu'utu'uni kenau mâtuku â ki 'api.

Ko e Kautaha Ngaohi'anga Tapaka ko 'eni´ na'e fokotu'u pea lêsisita ia ko e fale ngaohi'anga tapaka 'o 'uhinga´ 'e ngaohi 'a e tapaka´ 'i Tonga´ni pea toki hû atu ki tu'apule'anga. Ko e femahino'aki 'eni 'a e Pule´, Tsai mo e Potungâue Fefakatau'aki´.

Ka 'i he kamata ko ia 'a e faifatongia 'a e kautaha´ni na'e te'eki tu'o taha ke ngaohi ha tapaka ia 'i Tonga´ni ka ko e hû mai pê mei Siaina 'o toki fa'o puha 'e he kau ngâue´ 'i Tonga´ni pea 'ikai hû ia ki tu'apule'anga ka e fakatau fakalotofonua ia. Pea ko e fakahâ ko ia mei a Tsai ko e kamata´ pê ia pea 'i he'ene hoko atu 'e ngaohi pê ia 'i Tonga´ni 'i ha tu'uta 'a e ngaahi mîsini ngaohi tapaka´.

Na'e a'u 'o 'osi 'a e 'uluaki koniteina tapaka´ 'i hono fakatau atu pea to e hû mai mo e koniteina hoko´ 'oku te'eki pê ke 'omi 'a e ngaahi mîsini na'e tukupâ 'a e Pule´ 'e fakatu'uta 'i Tonga´ni 'o a'u ai pê ko 'eni ki he'ene tâpuni.

Na'e fai e feinga ki a Tsai ka na'e 'ikai ma'u hano faingamâlie ka 'i ha fakamatala ia 'a e taha 'i he kau ngâue 'i he Fale Ngaohi'anga Tapaka´ni na'a ne pehê na'e fakahâ ange ki a nautolu kenau mâtuku pê 'o fakaongoongo he 'oku 'ikai to e 'i ai ha ngâue ke fai.

Ko e tâpuni 'eni 'a e ngâue'anga´ni ka kuo faka'atâ 'e he Potungâue Fefakatau'aki´ ia kenau hû koloa ta'etute mai fe'unga mo ha $2 miliona tupu.