Fika 5 ‘a Tonga he kalasi B

‘I he hili ko ia e fe’auhi ‘akapulu ki he ipu ‘a mamani´ ‘a e ta’u 19 kuo a’u hake ‘a Tonga ‘o fika 5 he fakahokohoko ‘a e kalasi ua´ pe Division B. Koe’uhi´ ko e ‘ikai ke ola lelei e feinga ‘a Tonga´ kuopau ai pe kenau toe tau’i mo Ha’amoa mo Fisi pe ko fee e fonua te ne fakafofonga’i e Pasifiki´ ki he fe’auhi ipu ‘a mamani he ta’u fo’ou´.

Kaekehe ko e fe’auhi ‘a e kalasi ua´ pe kohai te ne ikuna ‘enau fe’auhi´ ko ia ia ‘e hu hake he ta’u ‘e taha´ ‘o fe’auhi he Division A ki he ipu´. ‘A ia ko e kalasi ua´ ia ‘oku ‘ikai kenau fe’auhi nautolu ki he ipu´ ka ‘oku nau fe’auhi nautolu pe kohai ‘oku fekefeka ke hu hake ki he A ‘a ee ‘oku nau fe’auhi ki he ipu´.

‘I he fe’auhi ‘a e Division B na’e ikuna ia ‘e Romania hili ia ‘enau vevela’i ‘a Uruguay he fainolo´ ‘aki e kai 30 - 7. ‘I he’ene pehee´ ‘e hu hake leva ‘a Romania he ta’u fo’ou´ ki he Division A ‘o fe’auhi ki he ipu´.

Ko e fika 5 ko ‘eni ‘a Tonga he fakahokohoko ‘a e Division B hili ia ‘enau vevela’i ‘a Lusia ‘aki e kai 22 - 6. ‘A ia ko e fo’i ikuna ‘eni ‘e 3 ‘a Tonga pea fo’i he 2. ‘A ia na’a nau ikuna ‘i USA, Canada mo Lusia ka nau fo’i ‘i Uruguay mo Namibia.

Ko e fakahokohoko leva ‘eni ‘a e Dividion B, 1. Romania; 2. Uruguay; 3. Chile; 4. Namibia; 5. Tonga; 6. Lusia; 7. Canada; 8. Portugal; 9. Korea; 10. Thailand; 11. USA; 12. Morocco.

‘I he fakahokohoko ‘a e Division A ‘oku 1. Nu’usila; 2. Falanise; 3. Saute ‘Afilika; 4. England; 5. Wales; 6. Australia; 7. Japan; 8 Sikotilani; 9. Georgia ne fika 10 ‘a Ireland ka ne fo’i tau pe ‘e taha ne nau fai´ pea nau holomui nautolu tupu mei he pekia e taha ‘enau kau va’inga´. ‘Oku fika 11 ‘a ‘Asenitina pea 12 ‘a ‘Itali.