Ikuna ‘e Nu‘usila ‘a e Ipu ‘a mamani he fe‘auhi e ta‘u 19
Fa’u ‘e ‘Ulu’alo Po’uhila

KUO hanga ‘e he timi ‘akapulu fakafonua ta’u 19 ‘a Nu’usila´ ‘a ia ‘oku ‘iloa koe Baby All Blacks ‘o hamusi e ipu ‘a mamani he fe’auhi ‘a e ta’u 19 hili ia ‘enau vevela’i e timi ‘a Falanisee ‘aki e kai 34 - 11.

Ko e hisitolia e fe’auhi ni ko e tu’o 4 ‘aki ‘eni hono ikuna’i ‘e Nu’usila e fe’auhi´ ‘a ia ko e 1999, 2001, 2002 mo e ta’u ni. Ko e ngaahi ta’u kimu’a´ ko e taimi ia ne kau ai ‘a Sam Tu’itupou mo e ni’ihi Tonga he timi´ ni.

Kaekehe ‘i he fe’auhi ‘o e ta’u ni ne fu’u fakaaoao ‘aupito e timi Baby All Blacks ia ngata pe he tau mo Saute ‘Afilika´ ne nau mei fo’i ai ka ne talunga mo e foaki ‘e he fakamaau e tau ni e fo’i tata’o he momeminiti faka’osi´ ‘o nau ikuna ai´. Ka ne ‘ikai ia ko e fo’i kuopau. Ne toki ‘osi e tau´ ia pea toutou hulu’i mai e fo’i tata’o´ ‘o mahino na’e homo e pulu´ ia ‘i hono taiva’i e laine tata’o´. Ko e pango´ ne ‘ikai ha fakamaau vitio ia he tau ni pea si’i holomui loto mamahi ai pe ‘a Saute ‘Afilika kae ikuna ‘e Nu’usila ‘aki e kai 30 - 23.

Kekehe ‘i he fainolo´ na’e fu’u fefeka pe e timi ia ‘a Nu’usila´ he na’a nau meimei ke pule’i e konga lahi e va’inga´. Pea toe ‘ai ai´ mo ‘enau sikalamu´ na’e fu’u fefeka ‘o taki ia ‘e he kapiteni e timi ni ko e matatolu ko ia ko Jamie MacKintosh. Pea ko e tali tangata´ ne toe fu’u kalasi mo ia ia.

‘I he ‘uluaki konga´ na’e taki ai ‘a Nu’usila ko e 14 - 3. Na’e pehee ‘e he faiako e timi ‘a Nu’usila´, Aussie McLean ‘i he maloloo´ ne kei ta’epau pe kiate ia e ikuna´ koe’uhi´ ko ‘ene sio ki he tifeni ‘a Falanisee´ pea na’e malava pe ke hoko ha me’a ia.

Ko e timi ‘a Nu’usila´ ne nau toki fakataha pe he uike ‘e 2 pea fakahoko e fe’auhi´. Pea ko ‘ene palani´ he’ikai kenau oo atu pe ‘o va’inga he tu’unga tatau ka ke fakalakalaka ‘enau va’inga´ he fo’i tau kotoa pe. Neongo ia na’a ne kei falala pe ki he’ene timi´ tenau fai e me’a he konga hono ua´.

‘I he ‘uluaki konga´ ne ‘uluaki fokotu’u ‘e Falanise e fuofua poini´ ki he papa tohi kai´ mei ha’anau fo’i ‘aka tautea, ka ne fetongi tuki’i mai ia ‘e Nu’usila ‘aki ha fo’i tata’o ‘enau huka´, Lance Po-Ching pea ‘akahi ia ‘e he le’okolo´, Miah Nikora ‘o huu. Pea ki mu’a he maloloo´ na’e toe ‘ai ‘e he huua ‘a Nu’usila´ ha toe fo’i tata’o ‘e taha pea hu mo e ‘aka´ ‘o nau 14 - 3 he maloloo´. ‘I he tu’u hono ua´ na’e toe ‘ai ai ‘e he huua ko Jeremy Thrush mo e peleki’auei ko Kieran Read ha takitaha e tata’o ‘o nau ikuna ai´. Na’e ma’u pe e fo’i tata’o ‘e taha ‘a Falanise mo ‘enau fo’i ‘akatautea ‘e taha.

Ko e hala ko ia ‘o Nu’usila ki he ipu´ na’a nau vevela’i ai ‘a Ireland 30 - 6, Georgia 81 - 12, Australia 30 - 5, Saouth Africa 30 - 23 pea mo Falanise.

Ko e toko 2 Tonga he timi ni ko e haafe´, Taniela Moa moe sekeni´ ko Seminar Manu.