Fakamamahi‘i ‘e Nakolo ‘a Houmakelikao he tau lahí 6-3
Fa‘u ‘e Tevita K. Takitaki

NUKU‘ALOFA— Neongo na‘e ki‘i mâlôlô ‘a e ‘u kalasi ‘uluakí ‘i he fe‘auhi fakakalapú ‘i he Tokonakí ka na‘e vevela‘i ‘e he timi fakalakalaka ia ‘a Nakolo ‘a Houmakelikao ‘i he tau lahí ‘aki ‘a e kai 6-3 pea salute ‘a e reserve ‘a Fasi/Ma‘ufanga ki Vaini 14-0 ‘i he tau kasete ‘i ha va‘inga matu‘aki mâlie mo fepolepolei mo‘oni.

‘Oku kau ‘a e ongo kalasi ko ‘eni ‘i he mâlie taha ‘i he fe‘auhi fakakalapu ‘o e ta‘u kotoa pe pea ‘asinga ai he ko e ongo kalasi ‘eni ‘oku teu‘i ai ‘a e ni‘ihi ke nau hiki hake ‘o kalasi ‘uluaki ‘i he ta‘u hokó.

‘I he taimi tatau ‘oku va‘inga ‘i he ongo kalasi ko ‘eni ‘a e kau ‘Ikale Tahi motu‘a ‘a ia ko ‘enau va‘inga pe ke ma‘u ‘a e mo‘ui leleí he kuo ‘osi ‘a e taimi na‘a nau kei ma‘u ai ‘a e vevé mo e fefeká.

Kaekehe ‘i he fetaulaki ‘a e timi fo‘ou ‘a Houmakelikaó mo e kau liiki ‘a Nakoló na‘e toki mahino pe ‘a e ikuna ‘i he ifi faka‘aulolongo ‘a e fakamâau ‘i he ‘osi ‘a e taimi kakató.

Neongo na‘e ‘ikai ha timi ‘e a‘u ki he laine tata‘o ka na‘e mahino ‘a e tau‘aki teuteu lahi ‘a e ongo timí ‘o ‘ikai lava ‘e ha timi ke kolosi ‘i he laine tata‘ó.

Na‘e pauni tatau pe ‘a e ongo timi ni ka na‘e mahino ‘a e lelei ange ‘a e tali tangata ‘a Nakoló ‘o malava ke nau tukuhifo‘aki ‘a e kau foueti pauni mamafa ‘a Houmakelikaó.

Kapau na‘e lava ‘e Houmakelikao ‘o va‘inga‘i fakafoueti ‘a Nakolo mahalo na‘e mei kehe ‘a e olá ia ka ‘i he‘enau laku ki he‘enau tautua‘a na‘e lau ia ‘e Nakolo ko honau faingamalie he ‘oku lelei ]a e tali tangata ia ‘enau tautua‘a.

‘I he konga ‘uluaki na‘a na mahanga tau‘aki 3 mei ha ‘aka tautea ka ‘i he konga hono uá neongo na‘e ‘i ai ‘a e faingamâlie tata‘o ma‘a Houmakelikao ka na‘e homo ‘a e pulú ia ‘i hono paasi atu ki he‘enau kapakaú.

Na‘e toe ‘ai leva ‘e Nakolo ‘a ‘enau fo‘i tolopu mo e ‘osi ‘a e taimi kakató ‘o nau ikuna‘i ‘aki ‘a Houmakelikao 6-3.

Ko hono mo‘oni ‘oku te‘eki ke fu‘u ma‘u ‘e he timi ‘a Houmakelikaó ha taukei fe‘unga ki he ‘akapulú pea ‘asinga ai he ko ‘enau toki hû pe he ta‘u kuo‘osí ‘o kau ki he fe‘auhi ‘akapulu fakakalapú.

‘I he fetaulaki ‘a reserve ‘a Vaini mo Fasi/Ma‘ufangá na‘e kau ia ‘i ha va‘inga mâlie mo‘oni pea neongo na‘e va‘inga ma‘a Fasi/Ma‘ufanga ‘a e le‘okolo fuoloa ‘a e ‘Ikale Tahí ko Kusitafu Tonga ka na‘e kei malava pe ‘e he kau leka ‘a Vainí ‘o nafui kinautolu ‘o hangê ha kehé.

Na‘e fakamahino foki ‘e Mani Vakaloa mei he timi ‘a Vainí ‘oku ‘ikai ke fu‘u fiema‘u ‘a e lalahí mo e pauni mamafá ‘a ia na‘a ne leleaki‘i holo ‘a e kau foueti mo e tautua‘a ‘a Fasi/Ma‘ufangá ‘o nau a‘u ki he mate hela‘ia holo ‘i loto mala‘e.

Na‘e faka‘aonga‘i lelei ‘e Mani ‘ene ve‘e vave mo ‘ene kakalo ‘o hangê kuo hê holo ai pe ‘a e fu‘u timi lalahi mo mamafa ‘a Fasi/Ma‘ufangá.

‘I he konga ‘uluakí na‘e taki pe ‘a Vainí 7-0 mei ha tata‘o mâlie na‘e fakahoko ‘e Vani Vakaloa ka ‘i he konga hono uá neongo na‘e lahi ‘a e ‘oho kai ‘a Fasi/Ma‘ufanga ka na‘e hangê ha ‘amaká ‘a e tifeni ‘a Vainí.

‘I he ngaahi ola kehé ‘i he fetaulaki ‘a e ‘u timi reserve na‘e vevela‘i ‘e he Toa ko Ma‘afú ‘a Ha‘ateiho ‘aki ‘a e kai 29-18; Mu‘a Saints 19, Havelu 8; Lavengamâlie 19, Kolomotu‘a 13 pea malohi ‘a Vaini ‘i Fasi/Ma‘ufanga 14-0.

‘I he ngaahi timi fakalakalaka na‘e ikuna‘i ‘e Sopu ‘a Hofoa 25-5; Hihifo 34, Lavengatonga 3; Nakolo 6, Houmakelikao 3; Longoteme Marist 16, Fatumu 3; Fasimoeafi 12, Ngele‘ia 6; Nukunuku 20, Talafo‘ou 3; Houma 31, Fua‘amotu 20; Matangiake 18, Lapaha 14; Kauvai 14, Ha‘asini 10.