Toko 19 ke nau teuteu ki he fe‘auhi fuhu ‘Oseniá
Fa‘u ‘e Tevita K. Takitaki

NUKU‘ALOFA— ‘Oku ngali tomui ‘a e nofo taha mo e teuteu ‘a e timi fuhu ‘amatua ‘a Tongá ki he fe‘auhi fuhu ‘a e ‘Oseniá ‘i he uike faka‘osi ‘o e mahina ni ka ‘i he vakai ‘a e kau fuhú kuo fuoloa pe ‘a ‘enau takitaha teuteu pe ‘i honau feitu‘u takitaha.

Hangêhangê ‘oku ‘ikai mahu‘inga‘ia ‘a e komití ‘i he taleniti mo e fatongia ‘o e fånaú ka ‘i hono ‘ai ke mahino angé ko e me‘a fakaloloma ko e masiva.

Kaekehe kuo filifili ‘e he komiti fuhu ‘amatua ‘a Tongá ha toko 19 ke nau kamata nofo taha ‘i he uike kaha‘u mo tesi‘i faka‘osi pe kohai tene fakafofonga‘i ‘a e fonuá ki he fe‘auhi fuhu mahu‘inga taha kuo kau kiai ‘a Tonga ‘i he ta‘u ni.

Ko e toko 19 kuo filí ‘a ia ‘oku kau kiai ‘a Ma‘afu Naufahu Minny mei Nu‘usila, Sinela Fifita mei Sopu, ‘Opeti Muli mei Longoteme mo Taniela Fale mei Mu‘a ‘a ia ‘oku nau fuhu kinautolu ‘i he pauni mamafa ‘aupitó.

‘I he pauni mamafa´ ‘oku kau kiai ‘a Hausia Vaka mei Ha‘asini, Sione Argull mei Nu‘usila, Sione ‘Akau‘ola mei Ha‘apai mo Lee Fale mei Mu‘a.

Ko Jimmy Makihele mei ‘Amelika, Nimilote Halafihi mei Lapaha mo Siô Vea mei Ha‘ateihó ‘oku nau fuhu kinautolu ‘i he pauni mamafa ma‘ama‘a pea ko Saia Vaka mei Nu‘usila, Viliami Ta‘ofi mei Ha‘ateiho mo ‘Ioane Lau‘i ‘o Vava‘ú ‘oku nau fuhu kinautolu ‘i he pauni lotolotó.

‘I he pauni welter ‘oku kau kiai ‘a Viliami Tau‘aika mei Vava‘u, Mosese ‘Ofa mei Ha‘ateiho mo Sione Fåmeitau mei Kolonga.

‘I he pauni ma‘ama‘a´ ‘oku kau kiai ‘a Kapelieli Taula mei Longoteme pea ‘i he pauni fulufulu‘i moá ‘oku kau kiai ‘a Setaleki Maka mei Nu‘usila.

Ko e kau faiako ‘oku kau kiai ‘a Lolo Heimuli mei Nu‘usila, Kisione Fakafanua mei Ma‘ufanga, Paula Fa‘otusia mei Ha‘ateiho mo Santa Maile mei Ha‘asini.

‘Oku fale‘i fakatekinikale ‘a Toni Fulilangi, tokoni ‘a Tu‘ihalafatai Veikune pea ko e pule ‘i he timí ko Tiuke Mahoni mei Ma‘ufanga.

Na‘e fakahâ ‘e Kisione Fakafanua ki he ongoongo sipoti ‘o e nusipepa ni ‘oku fakafiefia ‘a e kau mai ‘a Lolo Heimuli mo ‘ene timí he kuo fuoloa ‘a ‘enau teuteú pea ‘ikai ngata ai´ ka ‘e matu‘aki tokoni‘i lahi ‘e Lolo ‘a e timi fuhu ‘a Tongá ‘i he ki‘i taimi ko ‘eni ‘oku toe ki he fe‘auhí.

Ko hono mo‘oni ‘oku kau ‘i he timi ni ‘a e kau matiketika ‘i he fuhú pea ko e toko ua ai kuo na ‘osi ma‘u metali siliva ‘i he fe‘auhi fuhu ‘a e ‘Oseniá ‘a ia ko Viliami Tau‘aika mo Jimmy Makihele.

Ko Jimmy na‘e teuteu pe ia ‘i ‘Amelika pea neongo na‘e te‘eki kene fuhu ‘i he ta‘u ni ‘i Tonga ni ka ‘oku fai ‘a e fakatu‘amelie kiate ia mei he‘ene pate‘i fuhu mei ‘Ameliká.

Ko Viliamí kuo fuoloa pe ‘ene teuteu mo Toni Fulilangi mo Tu‘ihalafatai Veikune pea ‘oku fai ‘a e fakatu‘amelie kiate ia he kuo fuoloa ‘ene toutou fakafofonga‘i ‘a e fonuá.

‘I he toenga ‘o e sikuatí kuo nau ‘osi kau atu ki he ngaahi fe‘auhi fakavaha‘apule‘anga ‘a ia ngalingali kuo nau ma‘u ‘a e ki‘i taukei fe‘unga ke nau tau tuki mo e kau to‘a mei ‘Aositelelia mo Nu‘usilá.

Kaekehe na‘e fakahâ ‘e he sekelitalí, Sione Moala Mafi ‘e kamata nofo taha ‘a e sikuatí ‘i he uike kaha‘u´ pea ‘e toki tesi‘i ai ‘e he kau faiakó pe kohai ‘e kau ki he timi ‘a Tongá.

‘I hano faka‘eke‘eke ‘o Kapelieli Taula ‘o Longotemé na‘a ne fakahå ‘oku fai pe ‘a e teuteu ‘i ‘api ka na‘e mei fakalata ange kapau na‘a nau teuteu fakataha mo e toengá he‘e malava kenau fevahevahe‘aki ‘a e taukei kuo a‘usia ‘e he ni‘ihi kuo fuoloa ‘enau fuhú.

‘Oku ‘i ai ‘a e faka‘amu ‘a e komití na‘a lava ke fai ha tokoni lolotonga ‘a e nofo taha ‘a e timí pea ‘ikai ngata ai ka ‘oku fiema‘u ke lotua ange ‘a e timi fuhu ‘a Tongá ke ma‘u ha ola ‘oku fakafiefia ki he fonuá.