Kilikiti‘i ‘e he Sila Peluuá ‘a Kolofo‘ou
Fa‘u ‘e Tevita K. Takitaki

Na‘e ‘ikai ko e mala‘e Teufaivá pe na‘e fokotu‘u ai ‘a e ‘u lekooti fo‘oú lolotonga ‘a e fe‘auhi sipoti fakakolisi hono 57 ‘a e ngaahi kolisí ka ‘i he fetaulaki ‘a e timi ‘akapulu ‘a e Sila Peluuá mo e Laione ‘a Kolofo‘oú ‘i he mala‘e va‘inga ‘a e Kolisi Tongá na‘e fokotu‘u lekooti ai mo e Silá ‘aki ‘a e kai 43-21 pea pehê ki he kai 53-5 ‘a e timi U21 ‘a Kolofo‘ou ‘i Fua‘amotu.

Ko e ongo kai lahi taha ‘eni kuo fokotu‘u lolotonga ‘a e fe‘auhi ‘akapulu fakakalapu ‘o e ta‘u ni pea neongo ‘oku te‘eki ke vaevaeua ‘a e fe‘auhí ka ko e kai ‘eni ‘oku lahitaha he taimi ni.

Kaekehe ko ha va‘inga na‘e matu‘aki fepolepolei mo mâlie pea na‘e hâ pe ia mei he tu‘u ‘a e kaí he na‘e fakafekiki hake pe mo Kolofo‘ou ‘i he konga hono uá neongo na‘e ki‘i tomui si‘i ‘enau ‘enau tuli kaí.

‘I he taimi tatau kuo fakatokanga ‘a e Sila Peluuá ki he toenga ‘o e ngaahi timí kenau tokanga he ko e ta‘u ni ‘oku nau taumu‘a kenau fa‘ao ‘a e ipú mo e pale ‘uluakí mei he timi hau ta‘eliua ‘a e Toa ko Ma‘afú.

‘I he konga ‘uluakí na‘e taki pe ‘a e Silá ‘aki ‘a e kai 28-7 ka ‘i he tu‘u hake ‘i he konga hono uá na‘e mofisi ‘a e kau liiki ‘a Ha‘ateihó ‘o nau fakahoko ha fo‘i tata‘o hokohoko ‘e ua ‘o nau ikuna‘i ‘aki ‘a e timi iiki ‘a Kolofo‘oú.

Na‘e matu‘aki mahino ‘a e pauni mamafa mo lalahi ange ‘a e Sila Peluuá ka ki he kau to‘a mei Kolofo‘ou na‘a nau ngaue ‘aonga ‘aki ‘enau kau tautua‘á ‘o lava ke nau pukepuke hifo ‘a e fu‘u timi lalahi mo lele hangatonu ‘a e Silá.

He‘ikai ke hala ka foaki ‘a e tangata va‘inga mâlie taha ‘o e tau ni ki he feesi ‘a e Sila Peluuá, Tevita Kaufusi he ko ‘ene taukei ‘i he tu‘unga ni na‘a ne lava ke tuku holo ‘a e va‘ingá ‘o hangê kuo hê holo ai ‘a e timi ‘a Kolofo‘oú.

‘I he ngaahi ola kehé na‘e mâlô pe hao ‘a e Toa ko Ma‘afú ‘i Kolomotu‘a ‘aki ‘a e kai 17-10. Ko e fuofua taimi ‘eni ki Kolomotu‘a ke nau ulungia pea neongo na‘e lahi pe honau faingamâlie ke nau ikuna‘i ‘a e timi hau ‘a e Toá ka na‘e mahino ‘a e ki‘i taukei ange ‘a e kau va‘inga ‘a e Toá.

Na‘e mahanga tau‘aki 7 ‘a e ongo timi ni ‘i he konga ‘uluaki ka na‘e toki faiva ‘a e haafe ‘a e Toá, Sikuti Vunipola ‘i he konga hono uá ‘one fakahoko ai ha fo‘i tata‘o pea ‘akahi ‘e Sione Tu‘ipulotu ‘o hú fakataha mo e ‘aka tautea ‘e taha ‘o nau ikuna‘i ‘aki ‘a Kolomotu‘á.

Ko e va‘inga mâlie taha ‘i he fetaulaki ‘a e ngaahi kalasi ‘uluakí ko hono tukuhifo‘i koia ‘e he timi fo‘ou ‘a e Fuekafá ‘a e timi ‘a Havelú ‘aki ‘a e kai 13-5.

‘Oku pauni tatau ‘a e ongo timi ni pea neongo na‘e hu ‘a Havelu ki he kalasi ‘uluakí ‘i he ta‘u kuo‘osí ka ko e Fuekafá ko e hau ta‘eliua ‘i he ta‘u kuo‘osí ka ‘oku hiki hake he ta‘u ni.

Ko e toki hû fo‘ou hake foki ‘a e Fuekafá ‘i he ta‘u ni pea neongo na‘a nau ulungia ki Kolomotu‘a ‘i he uike kuo‘osí ka na‘e tô honau mamahí ‘o si‘i taufale‘i ‘a e timi ‘a Havelú.

Na‘a na lalahi tatau mo pauni tatau ka ko e ki‘i makehe‘anga ‘o Te‘ekiu ko e ve‘evave mo kakalo ‘enau tangata kapakau ko Lopeti ‘Uli.

Ko e tangata Papua Niukini ‘eni ka ‘oku mahino ‘a ‘ene ve‘e vave pea ko e tata‘o ‘e ua ‘a e Fuekafá ko e tata‘o mâlie ia na‘e fakahoko ‘e he tangata ni.

Ko e tangata sino si‘i ka ko e taimi ‘oku ne ma‘u ai ‘a e pulú ‘oku ne saiti‘i ha toko ua pe tolu pea ko ‘ene hao atu ai pe ‘ana ki he laine tata‘o.

Kaekehe ko e tangata ni ‘oku ‘i ai hono kaha‘u lelei ‘i he ‘akapulu pea neongo kuo ne ‘osi tau filifili pe ‘i he timi tautau toko 7 ka ‘oku te‘eki ke ‘i ai hano faingamalie kene fakafofonga‘i ‘a e fonuá.

‘I he fetaulaki ‘a e Spartan ‘a Ha‘ateihó mo e kau Sangato mei Mu‘a na‘e kei ulungia pe ‘a Mu‘a ‘aki ‘a e kai 30-3. Na‘e punou ‘a Lavengamâlie ki Fasi/Ma‘ufanga 12-3 pea mâlô pe hao ‘a e Marist ‘i he timi fo‘ou kae vave ‘a Tofoá ‘aki ‘a e kai 32-28. ‘I he fetaulaki ‘a Vainí mo Fangá na‘a na mahanga tau‘aki 7 ‘i ha va‘inga na‘e toki ma‘u pe ‘a e kai ‘a Fanga ‘i he momeniti faka‘osí.

‘I he ola ‘o e va‘inga ‘a e reserve na‘e malohi ‘a e Mu‘a Saints ‘i Lavengamâlie 5-0; Toa ko Ma‘afú 25, Vaini 20; Fasi/Ma‘ufanga 10, Haveluloto 5 pea malohi ‘a Kolomotu‘a ‘i Ha‘ateiho 15-10.

‘I he va‘inga ‘a e ngaahi timi fakalakalaka na‘e malohi ‘a Sopu ‘i Lotolu 12-6; Fahefa 22, Hofoa 3; Nakolo 22, Lavengatonga 21; Hihifo 35, Houmakelikao 0; Longoteme Marist 37, Fasi/Ma‘ufanga 10; Fatumu 41, Ngele‘ia 3; Houma 32, Talafo‘ou 21; Lapaha 29, Fua‘amotu 20; Sopu 10, Kauvai 10 pea malohi ‘a e Peauma‘a´ ko e ‘ikai lava mai ‘a Fasimoeafi 2.