Ta ko Ben Lummis ‘i he NZ Idol ko e Tonga

Na’e toki ‘ilo ‘i he po Sapate´ ta ko e mataapule ko ia ko Ben Lummis ta’u 25 ‘oku kau he toko 5 tu’ukimu’a taha he fe’auhi NZ Idol ko e matapule Tonga.

‘A ia ko ‘ene tu’u he taimi ni ko e toko 2 Tonga

‘eni ‘i he toko 5 tu’ukimu’a taha´ ‘a ia ko Ben mo Dave Houma (‘Otuhouma).

‘I he hili hono hiva’i ‘e Ben e fo’i hiva ko e Kiss From A Rose na’e fakahikihiki’i ia ‘e he kau fakamaau´ pea na’e ‘ekeange leva ‘e he tangata ‘oku ne fakalele e fe’auhi ni, Dominic Bowden pe ko e ha ne malohi pehee ai ‘ene fo’i hiva he po Sapate´ he ne ‘ilonga ‘ene sai´. Ko e tali ‘a Ben na’a ne pehee, koe’uhi´ ko e Tonga au pea ‘oku mau kai e hoosi´ ko e me’a ia ‘oku mau ivi lahi ai.

Ko e toko 5 ko ‘eni ‘oku toe he fe’auhi ni ko e filifili ia mei he toko lauiafe na’a nau feinga ki ai´. Pea ne ma’u ko ia e toko 10 tu’ukimu’a taha kenau fe’auhi ki he kalauni ‘o e fuofua NZ Idol na’e ‘i ai e toko 3 Tonga ai ‘a ia ko Ben, Dave pea mo Sela Mahe. Na’e to leva ‘a Sela he fika 9. Ko e malie´ ko e talu e kamata ‘a e fe’auhi ‘a e toko 10 tu’ukimu’a taha´ mo hono fili ma’u pe ‘a Ben ke ne kau he toko 3 ke fili mei ai kohai ‘e foki´. Ka ‘i he uike ni ne hao ai ‘a Ben ia kae kau ‘a Dave ia he toko 3 ke fili’i mei ai pe kohai ‘e nofo he fe’auhi´ .

Ko e malie´ ko e hao ‘a Dave ‘o na kau loua mo Ben he toko 5 ‘oku toe´. ‘A ia ko e 2 Tonga, 1 Mauli, palangi ‘e taha mo e fefine ko ia ko Camillia ‘a ia ‘oku peheee ko e Fisi.

Na’e fai leva e fekumi ‘a e nusipepa ni ki he hisitolia ‘o Ben ‘o mahino mai ko ‘ene fine’eiki´ ko e Mauli ka ko ‘ene tangata’eiki´ ko ‘Isileli Makisi mei Fo’ui. ‘A ia ko ‘ene tu’u he taimi ni ‘oku kainga ofi ‘aupito ‘a Ben Lummis pea mo e tangata hiva Opera ‘iloa ko ia ko Ben Makisi.