Ongoongo Nounou

T$100 lipooti ki he Royal Tongan

Kapau ‘oku ‘i ai ha’ate fie’ilo ki he ngaahi fakatotolo ‘a e Royal Commission ki he Kautaha Vakapuna Royal Tongan Airlines, kuopau ke te fakatau ‘a e la’i tatau ‘i he T$100.

‘Oku ma’u eni mei he ‘Ofisi ‘o e Crown Law ‘a e pule’anga´, pea ‘e ma’u kakato ai ‘a e ngaahi tohi ‘e ono, ‘a ia ‘oku fonu ‘i he ngaahi fakamatala pa’anga, mo e ngaahi fakaiikiiki ki he ngaahi me’a ‘oku hoko´.

‘Oku T$20 ‘a e fo’i lipooti´ ‘ata’atâ pê. ‘I he Tûsite´ na’e fai e fakaongoongo ki hono tukuange kitu’a. Na’e pehê ‘e he tokotaha mei he Crown Law ‘oku kei vakai’i ‘a Fale Pa’anga ki hono fakapa’anga ‘a hono paaki ‘a e ola ‘o e ngaahi fakatotolo ko eni´.

Feinga Matai‘ulua ke toe fakataha mo Lupepau’u

‘Oku ‘i Nu’usila ‘a Matai’ulua Fusitu’a pea kuo ma’u e fakamatala falala’anga ko ‘ene ‘alu´ ke feinga ke na toe fakataha mo ‘Eiki Lupepau’u Fusitu’a.

Na’e kole fakamolemole ‘a Matai’ulua ki he Kuini´ ‘i he Mônite´ , pea na’a´ ne tali. Na’e hâ’ele ‘a ‘Ene ‘Afio mo Kuini Halaevalu Mata’aho ‘i he Tûsite ‘o e uike kuo ‘osi´, pea muimui ‘i he Hâ’ele ‘a ‘Eiki Lupepau’u mo ‘ena tama´, Phaedra. Na’e puna atu leva ‘a Matai’ulua ‘i he Pulelulu´.

‘I he ngaahi feinga ko eni ke fai ha fakataha´, na’e pehê ‘e he tokotaha ofi ‘o e fâmili´, ‘oku ‘i ai ‘a e ni’ihi tonu ‘i he fâmili ‘o ‘Eiki Lupepau’u´ ‘oku ‘ikai ke nau loto ke na toe fakataha.

Kaekehe, ‘oku hoko kotoa ‘a e ngaahi me’a ko eni ‘i he te’eki ke lava ha ta’u ‘e taha ‘o e mali´.

Fetukutuku ‘a e Tu’i Fakamaau Lahi ki Fisi

Kuo ma’u ‘e he Tu’i Fakamaau Lahi Gordon Ward ‘a e lakanga ko e palesiteni ‘i he Sosaieti ‘a e kau Loea´, pea toe hoko ko e Fakamaau ‘i he Fakamaau’anga Tangi ‘i Suva, Fisi ‘i he ta’u´ ni.

Na’e fa’a lahi ‘a hono fakafepaki’i ‘e he Pule’anga Tonga´ ‘a e ngaahi tu’utu’uni ‘a Gordon Ward, ‘o fakatautefito ki he ngaahi hopo fekau’aki mo e nusipepa Taimi ‘o Tonga.

‘E folau ‘a Gordon Ward mo hono hoa´, Meg ki Fisi ‘i Sune.