|
Tu‘ukimu‘a taha he ako´ mei he Pasifiki´
KUO hanga ‘e he finemui konga Tonga ko Roberta Hager mei Christchurch ‘o hamusi ‘a e pale ko ia ki he finemui tu’ukimu’a taha ‘i he ako´ mei he ‘otu motu Pasifiki´ (All -round Pacific Island Scholar) ki he ta’u 2003. Ko e unuhi ‘eni ‘o Roberta mei he ola e sivi ‘a e ngaahi kolisi kotoa ‘o Nu’usila´.
Ko Roberta na’e ako ia ‘i he kolisi ‘a e Katolika´ ko e Villa Maria College ‘i Christchurch. Ko e ikuna ko ‘eni ‘a Roberta ‘oku ne ma’u ai ‘ene sikolasipi ke ako he mala’e ‘o e faito’o´ ‘i he ‘Univesiti ‘o Otago.
Fakatatau ki he fakamatala ‘a e puleako ‘o e Kolisi Villa Maria´, Mary Lynch na’e makehe ‘aupito e ‘ulungaanga ia ‘o Roberta he ‘apiako´. Ko e tokotaha mo’ui fiefia, pea teunga maau ‘aupito ki he ako´ he taimi kotoa pe pea ‘oku toe tanaki ki ai koe ‘ene fai ki he me’a kotoa pe ‘oku fakahaange ke ne fai´.
“’Oku mau polepole lahi ‘i he finemui ni,” koe lau ia ‘a Mary ki he nusipepa NZ Catholic.
‘I he fakamatala ‘a e fine’eiki ‘a Roberta, Tenisia ‘a ia koe fefine Tonga ia na’a ne pehee ko e tokotaha tokanga ‘aupito ‘a Roberta ki he ako´.
“Ko ia (Roberta) mo hono tuonga’ane´ kok e anga maheni´ ‘oku nau ‘aa hake nautolu ia he pongipongi´ ‘oku na ‘osi tangutu maau mai naua mo hona teunga ako´ he 7 pongipongi e ‘aho kotoa ‘o tali ke ‘ave naua ki he ako´. Na’e ‘ikai ke u ako’i naua ke na fai pehee. Na’e fanau’i pe ia mo e anga ko ia´,” ko e fakamatala ia ‘a Tenisia mo ‘ene kata´.
Ko e tamasi’i ako tu’ukimu’a taha mei he Pasifiki´ (Top all round Male Maori Scholar) ne ma’u ia ‘e J’aime Mikhael Karl-FrederickLaurenson mei he ‘apiako Auckland Grammar School.
Ko e pale ko ‘eni´ ‘oku foaki ia ki he tokotaha ako kolisi tu’ukimu’a ‘oku ‘i ai hano konga pe ko e tokotaha totonu mei he taha e ngaahi fonua e Pasifiki´. Pea kuo hanga ‘e he Minisita Ako´, Trevor Mallard ‘o hiki e pale pa’anga ki he tokotaha te ne ma’u e pale ni ke $15,000 he ta’u kotoa lolotonga e sikolasipi´.
|
