Tali ke to‘o $5,000 ko e hala ki he Tu‘i´

NA’E tali ‘i he fakataha ‘a e kau taki e Vahenga Ngaue ‘Okalani/Manukau´ ‘o e siasi Metotisi ‘a Nu’usila´ ke to’o ha $5,000 ‘o ‘ave ko e hala ‘o e Vahenga Ngaue´ ki he Tu’i´ ‘a ia ‘oku ne lolotonga ‘afio ‘i he ‘api ko ‘Atalanga´.

Ko e hala ‘eni ‘i he pekia ‘a hono ‘alo ko Ma’atu´ ‘a ia na’e pekia he mahina ko Fepueli´ pea ko e toki fuofua ha’ele mai ‘eni ‘a ‘Ena ‘Afifio´ ki Nu’usila ni hili ‘a e me’afaka’eiki´.

Fakatatau ki he fakamatala ‘oku ma’u ‘e he nusipepa ni ko e Uike Tapu ‘eni pea na’e ‘ikai ke tonu ke fai ha fakataha ai pea tanaki atu ki ai mo e folau ‘a e kau Faifekau ia ‘e ni’ihi ki he ‘Apitanga Pekia ‘i ‘Amelika´. Neongo ia ne kei ui pe e fakataha´ pea ne fai ai ha alea ‘i he kaveinga ni pea ne iku pe ‘o paloti ‘o tali ke to’o e pa’anga ni.

Ko e to’o ko ‘eni´ mei he Vahenga Ngaue´ ‘Okalani/Manukau´ pe pea ka ‘oku ‘ikai ke kau ai e Vahenga Ngaue ia ‘o Papatoetoe mo Otara.