Ikuna ‘e Nôpele Fotofili fili si‘i e fakafofonga Nopele ‘a e ongo Niua´
fa’u ‘e Mâteni Tapueluelu

NUKU’ALOFA: KUO ikuna ‘e Nôpele Fotofili ‘a e fili si’i e kau Nôpele ma’ae ongo Niua´ ki Fale Alea´ ‘o ne fetongi ai ‘a Nôpele Mâ’atu ne toki pekia´. Na’e fakahoko e fili ko eni´ ‘i he Ofisi e Palasi´ he pongipongi Pulelulu´.

Ko e kau Nôpele ‘e toko tolu ‘oku ma’u tofi’a ‘i Niua´ ‘a ia ne nau ‘i he fili´ kotoa ‘o kau ai ‘a Nôpele Fotofili, Nôpele Tangipâ pea mo Nôpele Fusitu’a.

Na’e mâhanga ai ‘a Nôpele Tangipâ pea mo Nôpele Fotofili. ‘I he angamaheni´ ‘oku fa’a toho’i leva ke mahino e ‘uluaki´, ka ne holomui ‘a Nôpele Tangipâ kae foaki e faingamâlie´ ma’a Fotofili.

Ko e mâhanga ‘a Nôpele Tangipâ mo Nôpele Fotofili´ kae ‘ikai ke kau ai ‘a Fusitu’a´ ‘oku ‘ikai mahino pe ko e hâ hono ‘uhinga´ he ‘oku mahino ne na takitaha e fili. ‘A ia ‘oku mahino mai ngali ne ta’efili e tokotaha ia.

‘Oku kau ‘a Nôpele Fotofili, ta’u 28, he nôpele ta’u si’itaha kuo fili ki Fale Alea´. Ko e ‘alo fika ua ia ‘a Nôpele Kalaniuvalu kuo´ ne pekia´, mo Pilinisesi Siu’ilikutapu.

Kaekehe, na’e fakahâ ‘e Nôpele Fotofili ki he Taimi ‘o Tonga´ ‘a ‘ene fiefia mo tali lelei e fatongia´.

“Ne u fakahâ pê ki mu’a he fili´ ‘i hono faka’eke’eke au ‘e he Taimi ‘o Tonga´, ko e hâ pê finangalo ‘o e ‘Otua´ mo e ola ‘o e fili´, ko ia pê. Pea te u fai hoku leleitaha´ ‘i he Fale Alea´. Ko e me’a lahi´ ke te faitotonu mo’oni,” ko e lau ia ‘e Nôpele Fotofili ki he Taimi ‘o Tonga´ ‘i ha le’o ne ongo faka’aki’akimui.

“Kuo ki’i fuoloa ‘eku ta’efolau ki he kâinga´ pea te u feinga ‘i he lolotonga´ ni ke u fe’iloaki mo e kâinga´ kae pehê ki he kau taki ‘o e ongo motu´.

“’E ‘ikai ke u palômesi ha me’a he ta’u ko eni ‘e taha te u hû ai´ ka ko u fakahâ te u faitotonu e fatongia´,” ko Fotofili ia mo ‘ene pehê kuo ‘osi telefoni ange ha ni’ihi ‘o e kau nôpele´ ‘o talamonû ange ‘i he’ene ikuna´.

‘Oku faka’amu ‘a Nôpele Fotofili ke ‘i ai ha taimi te ne lava ke ngâue fakataha ai mo e to’utupu´ ‘i he ngaahi kolo´. ‘Oku lahi ‘a e mo’ui fe’âmokaki ‘a e to’utupu´ mo e ni’ihi ‘oku ‘ikai ‘osi ‘enau ako´ mo ta’engâue.

‘Oku ‘i ai mo ha kautaha vitiô ‘a Nôpele Fotofili ko e Video Hut, ‘ai a ‘oku tu’u ‘i he ‘api ko Fatai´ ‘i Kolofo’ou. ‘Oku´ ne toe tokanga ki he langa ‘a honau ‘api nofo’anga ‘i Lapaha´, ‘a ia ‘oku ‘i ai mo ‘ene fine’eiki´, mo hono ta’okete´, Nopele Kalaniuvalu. Na’a ne ne pehê ko e ongo kakai mahu’inga taha eni ‘i he’ene mo’ui´.

‘Oku anga maheni’aki hono huufi e Fale Alea´ he konga ki mui ‘o Mee´. Pea ‘e hoko e ta’u ‘e taha ko eni ‘e hû ai ‘a Nôpele Fotofili´ ko ha ako lelei ki ai, he ‘e toe fai pê ‘a e fili ‘i he ta’u fo’ou´ pe kohai ‘a e kau nôpele mo e kau fakafofonga e kakai´ ‘e hû ki Fale Alea he ta’u ‘e tolu ka hoko´.