Hao ‘a Dave mo Sela ‘o kau he toko 9

Sela Mahe

‘I HE ‘uluaki fakatetee ‘a e kau hiva tu'ukimu'a taha ‘e 10 ne aoao mai he polokalama NZ Idol na'e hao ai ‘a e ongo Tonga ‘oku nau he fe'auhi ni, Dave Houma (‘Otuhouma) pea mo Sela Mahe ki he takai hoko´.

Na'e fili'i ai ‘e Nu'usila ‘a e matapule Ha'amoa ko ia mei Uelingatoni ko Filipo Saipani ko e fuofua tangata ia ke hu ki tu'a mei he Top 10 ne nau fili´.

Kaekehe neongo e hao ‘a Dave mo Sela ki he toko 9 ‘oku toe´ ‘oku ‘i ai e me'a ‘oku totonu ke fakalelei'i ‘e Sela ‘o kau ai ‘a e ngaahi fasi ‘oku ne fili ke ne hiva'i´ pe ko e fasi totonu´ ia pe ‘ikai. ‘Oku ‘ikai toe veiveiua ‘a e faka'ofo'ofa hono le'o´ ka ko e fasi ‘oku ne fili´ ‘oku totonu ke tokanga ‘aupito ki ai.

Fakatatau ki he fakamatala ‘a Sela´ ‘oku ne sai'ia he kau hiva hangee ko Stevie Wonder, Janet Jackson, Lauryn Hill, Alicia Keys, Jill Scott mo Eryka Badu ka ‘oku totonu ke ne toe tokangaange he fili e ngaahi hiva ke ne hiva'i´ he ka ‘ikai ke a'u ia ki he tu'unga totonu ne hiva'i ai ‘e he kau hiva totonu´ ‘enau ‘uu hiva´ ‘e hoko ia ko e palopalema ki ai.

Na'e ha ‘eni ‘i he lau ‘a e kau fakamaau ‘e toko 3 ‘i he fe'auhi ni. ‘I he hili ‘'enau hiva he po Sapate´ na'e ‘eke ai ki he kau fakamaau´ pe kohai ‘oku nau tui ‘e to mei he Top 10. Na'e fakaha ai ‘e Frankie Stevens ‘oku ne tui ko Sela. Na'e tatau ‘eni mo e lau ‘a Paul Ellis ‘a ia na'a ne fili ‘a Sela. ‘I he lau ‘a Fiona MacDonald na'e mahino mei ai ne ‘ikai koe fo'i hiva totonu ‘eni ne fili ‘e Sela ke ne fe'auhi'aki´.

‘I hono ‘eke ki he kau fakamaau´ pe kohai e toko 3 tu'ukimu'a taha he fe'auhi ni na'e tui ai ‘a Fiona McDonald pea mo Paul Elllis ‘oku totonu ke kau ‘a Dave ‘a ia ‘oku ‘iloa ko Big Dave he fe'auhi ni he toko tolu ko ia´.

Kaekehe ko e anga ‘eni ‘a e lau ‘a e kau fakamaau´ ‘a ia koe kau mataotao he mala'e ‘o e musika´, ka ko e fili´ ia ‘oku fai ia ‘e he kakai ‘o fakatatau ki honau loto´ kohai ‘oku nau tui ‘oku totonu ke hu ki he takai hono hoko´.