Ongoongo nounou 

Tu'usi 'a e ngaahi fakamole 'a e RTA

Kuo 'i ai ha ngaahi fokotu'utu'u ma'ae kau ngâue 'a e kautaha vakapuna Royal Tongan Airlines, 'a ia 'oku ne taumu'a ke tu'usi 'a e ngaahi fakamole´.

'I ha fakataha na'e fakahoko 'i he uike´ ni, na'e mahino ai he 'ikai ke toe ngofua ke folau ha taha 'i ha tîkite ta'etotongi (FOC). Kuopau ke lava 'a 'ete ngâue 'i he kautaha´ 'i ha ta'u 'e taha pea toki lava ai ke te folau 'i he totongi ma'ama'a makehe ki he kau ngâue´.

Ko e kau ngâue mau'olunga´, 'e tu'usi 'a 'enau vâhenga´ 'aki e pêseti 'e 10% ki he 15%, kau ai 'a e kau pailate´, 'enisinia mo e kau taki´.

'Oku 'ikai ke to e tali ke fai ha totongi ki ha ngâue he tu'a taimi´ (overtime) pea hoko atu ai pe mo hono ta'ofi fakataimi 'a e patiseti ki he ipu kofi mo e tî.

'Oku 'i ai mo ha ni'ihi 'e tukuange (redundant) pea he 'ikai ke toe hâea ha taha ngâue fo'ou. 'Oku toe hâ 'i he fakamatala´ 'a e 'ikai ngofua ke lea ha taha ki he mîtiaa´.

'I he fakamatala´, 'oku pehê 'e he Pule Lahi´, Logan Appu, ko e ngaahi tu'usi ko eni´ koe'uhi´ ko e taimi eni 'a e 'low peak', 'a ia 'oku tokosi'i ai 'a e kau folau´, pea kuo lahi 'a e mole 'a e kautaha´.

Te u papi 'uluaki mokopuna ua e Tu'i´

'E fakahoko 'a hono papi 'a e 'uluaki mokopuna ua 'o e Tama Tu'i´, kimu'a pea me'a atu 'a 'Eiki Lupepau'u Tuita Fusitu'a mo 'ene tama´, Phaedra, ki Beijing, Siaina.

Ka 'oku kei fakaongoongo ia ki he me'a mai 'a Kuini Halaevalu Mata'aho´, 'a ia 'oku´ ne lolotonga me'a 'i muli. 'Oku pehê 'i he tu'u he taimi ni´, 'e fakahoko e papi´ 'e Nôpele Tuita mo Pilinisesi Pilolevu Tuita.

Neongo 'a e ngaahi feinga 'a e fa'ê 'a Matai'ulua´, 'Eseta Fusitu'a, ke fakalelei'i 'a e vâ 'o e ongo me'a mali´, ka 'oku 'ikai ke toe tali 'e 'Eiki Lupepau'u mo hono fâmili´.

Hû ki he sôtia´ 'a Pilinisi 'Aho'eitu

Kuo hû 'a Pilinisi 'Aho'eitu Tuku'aho, ki he ako'anga sôtia 'a e Tau Malu'i Fonua 'o Tonga´.

Ko Pilinisi 'Aho'eitu´ ko e 'alo fika ua ia 'a e Tama Palêmia´, Pilinisi Lavaka Ata mo Pilinisesi Nanasipau'u Tuku'aho.

Kuo´ ne hoko ko ha 'Ofisa Kâteti 'i he Tau Malu'i Fonua´, pea na'a´ ne kamata ai 'i he mâhina kuo 'osi´. Na'a´ ne ako 'i Kamipela, 'Aositelêlia mo e Kolisi ko Tupou´.

Toloi e hopo Dr Feleti Sevele mo e Tonga Star

Kuo toloi 'a e hopo 'i hono faka'ilo 'e he Fakafofonga Fika 2 'a e Kakai Tongatapu´, Toketâ Feleti Sevele, 'a e 'Etita 'o e Tonga Star ki 'Epeleli 'o e ta'u kaha'u´.

Ko e faka'ilo´ 'oku makatu'unga ia 'i ha tohi ki he 'etita´, ne pulusi 'i he nusipepa 'i Fepueli, ta'u 2002. Na'e pehê 'e totongi pê 'i tu'a 'a e hopo´ ni ka ko eni 'e hoko atu ia 'i hono 'eke'i kakato 'e Feleti ia ono oongoongo´.