Kole fakamolemole UTRI

Kuo kole fakamolemole 'a e puleako 'Unuaki 'o Tonga Royal Institute, Dr Makafalani Tatafu, 'i he nusipepa Tongastar , ki he pule 'a e UNITEC, Toketâ John Webster, 'i hono ngâue hala'aki 'a faka'ilonga 'a e UNITEC 'i he ta'u kuo 'osi´ mo e kamata'anga 'o ta'u ni´.

'I he fakamatala na'e fa'u 'e Makafalani´, na'a ne pehê na'e hilifaki ai 'a e kalauni´ 'i he mata'itohi U, ke mahino ko e Pule'anga Fakatu'i, pea ko e loumaile´ 'oku´ ne hapai e kalauni´. Ko e loumaile´, ko e teunga ia 'o e ako´ hangê ko e faka'ilonga'i 'o e ako 'aki 'a e loumaile 'i he Kolisi ko Tupou´. Ko e teunga ia 'o e fonua ki he faiva pea pehê ki he ngaahi ouau kehe.

" 'Oku mau kole fakamolemole pê heni ki he UNITEC 'i he'emau ngâue'aki honau hingoa pea pehê ki he'enau loko, he 'oku toki mahino mai ki mui´ ni, na'e 'ikai ke sai'ia ai 'a e puleako," ko e lau ia 'a Makafalani´.

Na'a´ ne fakatâtâ'aki ha sai'ia pe 'a ha ki'i talavou 'i ha finemui, pea fiefia ai pe ia ke ui 'aki ia ha konga 'o e hingoa 'o e tokotaha ko ia´.

'Oku nau lolotonga talitali ki ha huafa mo ha loko fo'ou 'o e ako'anga´.