Kaniseli polokalama ako e UTRI
fa'u 'e Mâteni Tapueluelu

KUO iku kaniseli e polokalama ako 'a e 'Apiako 'Unuaki 'o Tonga Royal Institute (UTRI) koe'uhi´ ko e 'ikai ke ma'u 'a e pa'anga 'e $374,000 ne nau feinga ke foaki mola ange 'e he pule'anga´ ke kamata'aki e pisinisi´.

Kuo fakahâ ai 'e he Puleako´, Dr Makafalani Tatafu, 'oku 'ikai ke lava e polokalama ako fakatekinikale ne nau 'amanaki 'e kaungâ fakahoko 'e he UTRI mo e Auckland Unitec 'o hangê ko 'enau talaki 'i Tîsema ta'u kuo 'osi´, koe'uhi´ ko e nounou fakapa'anga.

'I he taimi tatau kuo foaki 'e he Potungâue Ako´ ha Laiseni Fakataimi (Provisional Approval) ki he UTRI 'i he ta'u 'e 2, 'a ia 'e lele ai e ngaahi polokalama ako kehe ia. Kuo ongo´ na ai 'i he Lêtiô Tonga´ 'a hono foaki ha sikolasipi 'e 20 ki Vava'u ki ha ni'ihi 'oku nau fieako he 'apiako´ 'a ia 'e kamata he mâhina´ ni. 'Oku ui e sikolasipi´ ni ko e Takiama´ pea ko e totongi ako´ 'oku $3000.

Ne feinga e nusipepa´ ni ke faka'eke'eke makehe 'a Dr Makafalani ka ne 'ikai ke ala ma'u ia. 'I he taimi tatau, ko e tokotaha na'a´ ne fokotu'u 'a e 'apiako´, Fakafofonga Fika 2 Kakai 'o Tongatapu´, 'Etuate Lavulavu, 'oku kei tali hopo ia 'i 'Amelika ki he ngaahi tukuaki'i kehekehe kau ki he tohi nima loi.

'I 'Okatoka ta'u kuo 'osi´ na'e kole ai 'e 'Etuate 'i Fale Alea ha $374,000 ke fakalele'aki hono 'akiako falatekinikale´ 'a ia ne ui he taimi ko ia´ ko e Unitec Tonga . Na'e fakakikihi e tokotaha´ ni 'e fakalele e polokalama fakatekinikale tatau tofu pê 'oku fakahoko 'i he Auckland Unitec 'i Nu'usila´ 'i hono 'apiako´ pea 'e ma'ama'aange ia ki he fânau ako Tonga´. Na'e tali eni 'e he Fale Alea´ 'i hono poupou'i 'e he kau minisitaa´ kau ai e Palêmia´, Pilinisi 'Ulukâlala Lavaka Ata.

'I hono huufi tuku 'e he Tu'i´, Taufa'ahau Tupou IV, e Fale Alea´ he ta'u kuo 'osi´ na'a´ ne fakahâ ai e teu fokotu'u 'o e 'apiako´. Ka ne kamata ai hono fakaanga'i fefeka 'e he kau Fakafofonga e Kakai´ 'a e fokotu'u ke pisinisi'aki 'e he tokotaha e pa'anga fakalukufua 'a e kakai totongi tukuhau´. Ne toe fakahoko ai 'e he Sea 'o e Kômiti Kakato´, Tama Tu'i Pelehake´, ha'ane fakaanga 'o pehê 'oku hâ fepakipaki mo fakafehu'ia e 'ave pa'anga´ he ko e Tu'i´ 'oku Pataloni he 'apiako´ pea toe Sea pê 'a e Pilinisisesi´, Pilolevu.