Feinga Pa 'anga ma'ae loea 'a 'Alani Taione´
fa'u 'e Mâteni Tapueluelu

NUKU'ALOFA: NA'E fakahoko he efiafi Falaite kuo 'osi´ ha kalapu 'i Kilikali ko e kamata ia e ngaahi feinga pa'anga 'e hokohoko mai he kaha'u´ ki he hopo e tangata nofo Nu'usila ko 'Alani Taione, kuo faka'ilo ki hono tufa e Taimi 'o Tonga´ 'i Tonga´.

Ko e kalapu´ 'oku fokotu'utu'u ia 'e he Kautaha Totonu 'a e Tangata´ mo e Temokâlati´ pea ne fakahâ 'e 'Akilisi Pôhiva ki he kalapu´, kuo´ ne ma'u 'a e tohi mei he loea Nu'usila ko Dr Rodney Harrison, ko ia te ne fakafofonga'i 'a 'Alani´ pea 'oku mahu'inga 'a e keisi ko eni´ he 'e mate ai pê e ngaahi hopo kehe 'oku 'amanaki ke fai he malumalu e lao fo'ou ki he nusipepa´.

"Ko e hopo 'a Taione´ ko e hopo mahu'inga he 'oku´ ne pole'i 'e ia e liliu na'e fai ki he Konisitûtone´. 'Oku makehe 'a e tufa pepa na'a´ ne fai´ he 'oku´ ne fakafepaki'i hangatonu tokotaha pê 'a e liliu kuo fai ki he Konisitûtone´. Pea 'oku 'i ai e fokotu'u ka 'i ai ha penipeni ki hono hopo'i 'o e liliu e Konisitûtone´ ke 'ave kâtoa ia ki he hopo ko eni´," ko 'Akilisi ia.

Na'e 'osi fakamo'oni foki e kau fakafofonga 'e toko 7 e kakai´ tukukehe e ongo fakafofonga mei Vava'u´, fakataha mo ha kakai kehekehe 'e toko 135 ke faka'ilo e pule'anga´ mo e liliu na'a nau fai ki he Konisitûtone´. Ko e ola e liliu ki he kupu 7 e Konisitûtone´, ko e lava 'a e pule'anga´ 'o fa'u e lao fo'ou ke pule'i'aki e nusipepa´ pea ta'ofi'aki e Taimi 'o Tonga´ mei hano toe tufa atu ''i Tonga.

'Oku 'amanaki foki ke foki mai 'a 'Alani ki Tonga he 'aho 22 ke faka'aho e 'aho 'e hopo ai´ he Fakamaau'anga Lahi´.

Na'e pehê 'e 'Akilisi ko e feinga pa'anga´ 'e fakahoko faka-Falaite ia ke totongi'aki e tikite 'a e loea´, nofo hôtele mo e konga hono totongi ia´. Pea neongo na'e 'ikai ke fakahâ e lahi 'o e pa'anga ne tânaki he pô Falaite´ ka na'a´  ne pehê kuo lava e totongi 'ene nofo hôtele´.