Fakakakato 'e Temisî Jnr 'a e fatongia 'ene fa'ê
Fa'u 'e Moeke Moala

SEN¸: Ko e taha eni ha talanoa ongo mo'oni 'i hono faka'eke'eke he Taimi 'o Tongá 'a e Tamai ko eni ko Sitilani Lafitani pea mo hono foha lahí ko Temisî si'i, 'i he lolotonga 'ena faifatongia 'i he ngâue ne fokotu'u 'e Sitilani ke hoko ko ha ma'u'anga mo'ui 'a hono ki'i fâmilí.

Fakatatau ki he fakamatala 'a Sitilaní kuo a'u eni ki he ta'u 'e taha 'a e ngâue ko 'ení, na'á na fokotu'u mo hono hoá ko Lomaipê 'Apiseki Lafitani.

Ko e hingoa 'o e ngâue fakapisinisi ko 'ení ko e 'Dempsey Mowing Service', ko hono kosi mo tauhi ke ma'a 'a hoto 'api nofo'angá.

Na'e pehê 'e Sitilani, na'e talu 'ene ha'u ki he fonuá ni mo 'ene ngâue ki he kakai kehé pea ne a'u ki he taimi kuó ne fa'u fâmili ai pea tu'unga ai 'a 'ene fakakaukau ke fokotu'u 'a e pisinisi ko 'ení 'i 'Epeleli 'o e ta'u kuo 'osí ke ma'u ai ha mo'ui 'ene fânaú he kaha'ú. Na'á na fakahoko mai mo hono hoá 'a e ngâué ko hono kosi e musie 'o e ngaahi 'apí, ta'ata'aki 'e ngoue matala'i'akaú, tâ mo e 'akaú ke matamatalelei, hiko e vevé pea mo hono tauhi ke ma'a fakaloto'apí.

'I 'Aokosi 'o e ta'u kuo 'osí ne fokoutua ai 'a e hoa 'o Sitilaní 'i he mahaki ko e kanisâ, pea na'e kamata mei ai 'a e fekuki e Tamai ko 'ení mo e faingata'á 'i he tauhi hono ki'i fâmilí. "Ko e koloa mahu'inga taha ki he fânaú 'a 'enau fa'ê pea kapau 'e mavahe 'a e fa'ê mei 'api, 'oku fu'u ongo 'aupito", ko e lau ia 'a Sitilaní.

'Oku 'i ai foki 'ena ki'i fânau 'e toko 3, ko Temisî si'i ta'u 12, 'Atiloa ta'u 11 pea mo Sioeli ta'u 5. 'Oku tokanga 'a e Tamai ko 'ení ke tauhi ki falemahaki hono hoá tokanga ki he'ena ki'i fânaú mo 'enau ngaahi kavengá, pea mo hono fakalele 'enau pisinisí.

Na'e fehu'i he Taimi 'o Tongá ki he Tamai ko 'ení pe 'okú ne mapule'i fêfê 'a 'ene fakakakato e ngaahi fatongia ki hono ki'i fâmilí lolotonga 'oku 'i falemahaki 'a hono hoá.

Na'e pehê 'e Sitilani, "Ko e 'eikí pê". Na'á ne fakamatala foki ki he tokoni lahi kuo fai 'e Temisî si'i mo 'Atiloa 'i he'enau nofó, neongo 'okú na kei ta'u si'i ka 'oku mahino kiate kinaua 'a e faingata'a kuo hoko ki he'ena fa'ê.

Kuo hopo hake leva eni 'a Temisî si'i 'o fakahoko e ngaahi fatongia fakafa'ê 'i honau loto fale´ pea mo tokoni kia Sitilani 'i hono fakalele 'enau pisinisí tautautefito ki he uike'ení mo e tutuku 'a e akó.

Kuó ne maheni ki hono ngâue 'aki 'a e ngaahi naunau me'angâué pea mo hono fakahoko lelei'i 'a e ngâué.

Na'e pehê 'e Sitilani, 'okú ne faka'amu ke tauhi he'ene fânaú 'a e ngâue ko 'ení he 'e ma'u ai 'enau mo'ui he kaha'ú.

'Oku 'ikai ke faingofua 'a e ngâué pea neongo kuopau ke fai 'a e likoliko mo e la'âina ka kuopau pê ke fakahoko e kalusefai, ke fua'aki e ako 'a e fânaú mo 'enau ngaahi kavengá.

'Oku lolotonga ako 'a Temisî si'i he kalasi 7 'i he Waveley College 'i Bondi Junction. Ko e fakamânako lahi taha ki he ki'i tamasi'i ko 'ení 'ene tokoni ki he'ene Tamaí he ngâué ko e lava pê ke ne fua 'ene kavenga fakaakó fakataha mo hono ki'i tuofefiné mo hono ki'i tokouá.