|
Hu 'a Sela 'o fakataha mo Dave 'i he Top 10
Dave 'Otuhouma |
KUO hanga 'e he finemui ko Sela Mahe mei Mangere 'o sila'i hono sea ki he toko 10 tu'ukimu'a taha he fe'auhi hiva NZ Idol.
Ko e hu hake ko 'eni 'a Sela 'o na toko 2 Tonga he Top 10 fakataha mo e matâpule ko ia ko Dave Houma ('Otuhouma).
Ko e fe'auhi ni ko e filifili 'eni mei he lauiafe ne nau kainititeiti ki he fe'auhi 'i he tapa kehekehe 'o Nu'usila. Na'e 'uluaki tukuhifo ki he toko 60 pe, pea toe tuku hifo ki he toko 24 'o nau tautau toko 8 he kulupu 'o fe'auhi ai pe kohai e toko 3 mei he kulupu 'e hu ki he Top 10. Na'e sila'i 'e Dave hono sea´ he uike kuo 'osi´ pea 'i he Monite 'o e uike ni na'e hanga ai 'e Sela 'o to'o e sea fika 7.
'I he hili e hiva 'a e kulupu ne kau ai 'a Sela´ he po Sapate´, na'e tui tatau ai e kau fakamâau 'e toko 3 'i he fe'auhi ni 'oku totonu ke kau 'a Sela he toko 10 tu'ukimu'a taha´. Pea 'i he fili 'a Nu'usila´ na'a nau loto ai ke hu 'a Sela 'o kau he Top 10. Na'e tokolahi taha e kau fili´ na'a nau fili 'ia Sela 'a ia ko e peseti 'e 22 ia e fili´.
Na'e hiva'i foki 'e Sela e fo'i hiva 'a Alicia Keys ko e How Come U Don't Call Me Anymore.
Ko e tu'u he taimi ni kuo mahino e toko 9 ki he Top 10 pea 'oku toe 'a e tokotaha 'a ia 'e fili'i ia 'e he kau fakamâau mei he ni'ihi ne nau too he fe'auhi 'a e toko 24 fakamuimui´.
Ko 'ene ma'u ko ia e toko 10 tu'ukimu'a taha´ tenau fe'auhi ai 'i he uike kotoa pea kuo pau ke fili'i 'e he kakai´ honau manako´. Ko ia 'e si'i taha hono manakoa´ 'e fakamaloloo'i ia mei he fe'auhi. 'A ia koe tokotaha he uike 'e fili ke nofo mei he fe'auhi´ kae 'oua ke ma'u e tokotaha te ne ikuna e fuofua NZ Idol.
Ko e toko 10 ko 'eni kuo fili´ 'oku nau ngâue vaofi 'aupito nautolu mo e tangata Talekita Musika 'iloa 'i Nu'usila ni ko Eddie Rayner pea pehê ki he fefine ko Suzzane Lynch ki hono ako'i, filio'i mo haiane'i e le'o 'o e kau hiva ni 'i he ngaahi hiva 'oku nau fili kenau hiva'i´.
Ko Sela´ ko e 'ofefine ia 'o Loseti mo Manu Ngata Mahe ka 'oku nau nofo Mangere. Fakatatau ki he fakamatala 'oku ma'u 'e he nusipepa ni ko Sela na'e tupu hake pe ia he 'atakai hiva he ko Loseti´ na'e faihiva pe ia he Siasi 'Ahofitu´. Na'e toe faiako foki 'a Loseti 'i he Kolisi Piula´ pea pehê ki he 'apiako Fulton 'i Fisi´.
Kaekehe 'oku lahi e faingamâlie 'o e ongo Tonga ko 'eni´ ke na hoko ko e fuofua NZ Idol ka 'e makatu'unga kotoa e fili ko ia´ 'i he fili 'e fai 'e he kakai´. Ko e lahiange e fili ki he tokotaha 'oku nau sai'ia mo loto ki ai´ ko 'ene saiange ia mo kau lelei kia te ia.
|
