Poupou'i 'e Nu'usila 'a Tonga ke hu ki he Fefakatau'aki 'a Mamani´

KUO lava 'a hono fakakakato 'e he Pule'anga Nu'usila´ 'a e ngaahi alea mo e kautaha Fefakatau'aki 'a mamani´ (WTO) ke faka'ata'atâ e hala 'o Tonga´ ke hu 'o memipa he kautaha´ ni.

Na'e fakahâ 'e he Minisitâ Fefakatau'aki 'a Nu'usila´, Jim Sutton ko e kakato ko 'eni 'enau alea´ kuo nau felotoi ai mo e pule'anga Tonga´ 'o fekau'aki mo e ngaahi fiema'u mo e me'a ke fai 'e Tonga 'i he fehu'aki koloa´ he hili 'enau hu 'o memipa he WTO.

Ko e kole foki 'eni 'a Tonga ke ne memipa he kautaha´ ni, ka ko e taha e ngaahi fiema'u 'a e WTO ke hanga 'e ha fonua 'oku fefakatau'aki lahi mo e fonua 'oku kole memipa´ 'o fai ha fa'ahinga aleapau fekau'aki mo e maketi´ mo e fefakatau'aki´ 'e hoa mo e fiema'u 'a e WTO.

Na'e fili ai 'e Tonga 'a Nu'usila 'a ia 'oku ne kau he fonua 'oku nau hu koloa lahitaha atu ki Tonga´.

Na'e pehê 'e Mr. Sutton ko 'enau alea ko 'eni mo Tonga´ 'e kau lelei ia ki he ngaahi pisinisi Nu'usila 'oku nau hu koloa atu ki Tonga´. Na'a ne pehê ko e taha e lelei 'o e alea ko 'eni mo Tonga´ he 'e mahino 'e hanga ai 'e he kau hu koloa mei Nu'usila ki Tonga 'o fakahaofi e $6 miliona he ta'u mei he ngaahi tukuhau 'oku hilifaki mai 'e he pule'anga Tonga´ ki he'enau koloa 'oku hu atu ki Tonga´.

'Oku poupou'i fefeka 'e Nu'usila h'a e kole 'a Tonga ke memipa kakato he WTO. Ka hu 'a Tonga 'o memipa kakato 'e lava ai ke kau kakato 'a Tonga he fefakatau'aki fakavaha'apule'anga´.