SHAKOBE: Ko ha hingoa 'e manatua mo 'ofa'i
Fa'u 'e Tevita K. Takitaki

'AOKALANI- Neongo kuo si'i pekia 'a Shakobe Kapiolani Tau 'i he ta'u kuo'osí 'i hono mahina 13 ka kuo hoko hono hingoá ko e makatu'u mo e mo'ui'anga ki he fâmilí .

'I he taimi tatau kuo fakakaukau ai hono ki'i tuofefine ta'u 14 ko Amanda ke kamata 'ene ki'i pisinisi 'i he Tokonakí ke kei fakamo'ui pe 'a e hingoa hono tuonga'ané lolotonga 'a e Pasifika Festival.

Ko ha talanoa faka'ofa mo fisifisimu'a 'eni 'a e lotolahi 'a Amanda kene fokotu'u ha'ane ki'i pisinisi ke kei fakamo'ui ai 'a e hingoa hono tuonga'ané pea 'ikai ngata ai ka kuo ne tukupâ ke foaki moha peseti 'e 10 'o e fakataú ke tokoni ki he tafa'aki 'oku nau tokanga'i 'a e mahaki kanisâ 'a e longa'i fânaú(Child Cancer Foundation).

'I he Tokonakí 'e kamata fakatau atu ai ha fanga ki'i falani lolotonga 'a e Pasifika Festival kuo 'osi tâ mata lalahi ai 'a e hingoa 'o SHAKOBE mo hono fanga ki'i tâ ke tokoni 'a e pa'anga koia ki he tafa'aki 'oku nau tokanga'i 'a e kanisâ 'a e fanau iiki pea ki hono fâmilí foki.

Ko Shakobe na'e pekia tupu mei he kanisâ toto pea neongo 'oku ongo fakamamahi 'eni ki he ongo matu'á, DJ Kenny mo Sandra Tau mei Kolonga mo Kolovai mo e familí ka kuo lotolahi 'a hono tuofefiné fika uá ke kamata'i ha ki'i pisinisi ke kei fakamo'ui pe 'a e hingoa hono tuonga'ané.

Na'e fakahâ 'e Amanda ki he ongoongo 'a e nusipepa ni he'ikai ngalo 'a e fofonga hono tuonga'ane 'ia te ia pea neongo kuo si'i pekia ka 'oku faingata'a ke mole hono ki'i matá meiate ia fakataha mo e toenga 'a hono ki'i fâmilí.

'' Neongo kuo ne si'i pekia ka ko e mamahi lahi na'a ne fe'ao moia lolotonga 'ene kei puké pea 'oku mau fiefia pe he kuo 'i Hevani 'a Shakobe'', ko e fakahâ fiefia ia 'e Amanda.

Na'a ne pehê foki 'oku lahi ange 'ene tui 'a e falani 'oku 'asi ai 'a e tâ hono tuonga'ane ka 'i he taimi tatau 'oku ou laukau'aki 'a 'eku tui 'a e falaní he 'oku ofi ai 'a Shakobe ki hoku mafú.

'' 'Oku ou taumu'a keu hoko ko ha toketâ 'i he kaha'u pea ko e taha pe 'a e 'uhinga lahi 'eku taumu'a ki he toketâ keu tokoni'i 'a e fânau 'oku nau mo'ua 'i he mahaki ko 'eni ko e kanisâ totó 'a 'e na'e mo'ua ai hoku ki'i tuonga'ane''. ko e fakahâ ia 'e he fika tolu 'i he fânau ko Sabrina ta'u 12.

Kâ ki he lahi taha 'i he fânaú, Latsha ta'u 16 kuo ne fakahâ 'oku ne fiehoko koha tokotaha ngâue fakafaifekau 'i he kaha'u 'i he Siasi 'o Sisu Kalaisi mo e kau Mâ'oni'oni 'o e Ngaahi 'Aho Kimui ni.

Kaekehe kuo tukupâ ai 'a e fanga tuofâfine ia 'o Shakobe ke nau fai ha ngaahi ngâue 'aonga ki he kakaí ke nau mo'ui ai ke faka'ilonga'i'aki 'a e pekia 'a honau tuonga'ané

Kaekehe 'oku ongo fakamamahi pea fakavaleloto ki he fâmilí ka ko ha matapâ ia ke liliu ai 'a e to'onga mo'ui 'a e tangata'eiki 'a Shakobe, DJ Kenny kene tui mo falala kakato ki he 'Eikí.

'' Na'aku inu kavamalohi mo ifi tapaka ka 'i hono 'ilo 'oku mo'ua 'a Shakobe 'i he kanisâ ne 'otometiki pe 'eku si'aki 'a e ifi mo e inu kavamalohi'', ko e fakahâ ia 'e Kenny.

Na'e fakahâ 'e DJ Kenny talu mei he mâloloo hono fohá mo e 'ikai tene toe ngâue ka 'i he Falaite 'o e uike ni tene foki 'o kamata ngâue 'i he Club Poly 'i loto 'Aokalani.