Tukuange 'a 'Alani ke folau ki Nu'usila
fa'u 'e Mateni Tapueluelu

NUKU'ALOFA: NA'E tukuange 'e Fakamaau Polisi Sâlesi Mafi 'a 'Alani Taione ke ne folau ki Nu'usila he efiafi Tu'apulelulu uike kuo 'osi´ kae toki tuli hopo mai. Ne folau mai 'a 'Alani he mahina kuo 'osi´ ki he me'afaka'eiki 'ene tangata'eiki´ pea ne tufa ai e Taimi 'o Tonga´ 'i mala'evakapuna 'o puke mo faka'ilo ai 'e he kau polisi´ pea iku puke ai 'ene paasipooti´.

Na'e malu'i taki $1000 ai 'e he tokotolu 'a e faka'iloa´ 'a ia ko e faka'iloa´ pê mo hono fâmili ofi 'e tokoua kehe kae toki tukuange 'ene paasipooti´. 'Oku 'ikai ke totongi fakahangatonu 'a e pa'anga ko eni´ ka kapau 'e 'ikai foki e faka'iloa´ ki he hopo´ 'e 'eke leva 'a e pa'anga´ ni ki he ni'ihi ne nau fai e malu'i´.

Ne fakahâ 'e 'Alani ki he Taimi 'o Tonga´ he tu'apô Tu'apulelulu´ ki mu'a pea´ne toki mavahe atu ki Nu'usila´ na'e fekau 'e he 'Ea Nu'usila´ ia ke ne totongi 'a e $500 kehe ki he'ene tikite´ koe'uhi´ ne 'ova ia 'i Tonga´ ni he fo'i vaha'a taimi ne totonu ke 'i Tonga´ ni ai´ 'a ia ko e 'aho 'e 21. Ne foki 'a 'Alani he 'aho hono 22.

"Ka 'i he fengâue'aki mo e 'Ofisi Talafekau Lahi Nu'usila´ mo e 'Ea Nu'usila´ ne lava lelei ai ke u folau ta'etoe totongi ha silini makehe mei he tikite ne u totongi´. 'Oku ou fiefia lahi ai he ngâue 'a e 'Ea Nu'usila´," ko 'Alani ia.