|
Fakafoki e kau Bangladesh toko 3
fa'u 'e Mâteni Tapueluelu
NUKU'ALOFA: NA'E fakafe'ao 'e he kau polisi´ e kau ngâue langa Bangladesh 'e toko tolu 'a Dr Wong ki mala'e vakapuna he pongipongi Tu'apulelulu kuo 'osi´ ke nau foki ki honau fonua´.
'Oku 'ikai mahino e 'uhinga kuo fakafoki ai kinautolu´ ka ko e toko tolu eni 'oku nau lava 'o fetu'utaki faka-Pilitânia´ 'a ia ne nau toutou fakahâ ki he Taimi 'o Tonga´ , Kele'a´ mo e Fakafofonga Fika 1 Kakai 'o Tongatapu´, 'Akilisi Pôhiva, 'a e mamahi e kau ngâue Bangladesh 'e toko 32 ne 'omai ke nau langa e hôtele´ he ngaahi uike si'i kuo maliu atu´, ko e talu 'enau tû'uta mai he ta'u kuo 'osi´ mo e ta'evahe.
Na'e 'i mala'e vakapuna mo 'Akilisi Pôhiva pea na'a´ ne fakahâ ki he Taimi 'o Tonga´ ne 'ikai ke ne fe'iloaki mo e toko tolu na'e fakamavahe'i´ pe fakapapau'i kuo 'oange 'enau vahe 'i he taimi kuo nau ngâue ai talu mei 'Okatopa ta'u kuo 'osi´.
Ne iku 'o fakapuna mai 'e he 'Ofisi Talafekau Lahi Bangladesh 'i Senee´ ha taha ke ne vakai'i e tûkunga 'oku 'i ai e kau ngâue´ ni, hili ia ha'anau fuhu mo e kau langa Taileni he hôtele tatau pê 'o iku 'ave ai ha toko 3 ki falemahaki.
Fakatatau ki ha fakamatala kuo ma'u 'e he nusipepa´ ni ne fai e fakahâ ki he kau polisi´ ke nau tokanga'i e vâ 'o e ongo matakali´ ni hili 'enau feke'ike'i´. Na'e tukuaki'i foki 'e he kau Bangladesh ia ne 'ohofi kinautolu'aki ha ngaahi fo'i pamu lolotonga 'enau kaukau´ pea ne konâ 'a e kau Taileni´. Kae pehê 'e he fakamatala kuo ma'u 'e he nusipepa´ ni ne pau ke tokanga'i atu 'e he kau polisi´ 'a e vâ e ongo matakali´ he 'oku toko 32 e kau Bangladesh kae toko 17 pê e kau Taileni´.
|
