|
'Ikai tu'unga e holo´ ko e Royal Tongan
'I ha fepotalanoa'aki mo e taha e kau ngâue Tonga 'a e 'Ea Nu'usila´, Lavinia Motulalo Tafa na'a ne pehee ne lahi e fetu'utaki ange 'o 'eke pe ko e 'uhinga nai hono holoki 'e he 'Ea Nu'usila´ 'a 'enau totongi´ koe'uhi´ ko e fe'auhi mo e Royal Tongan. Ka 'oku ne fie fakamahino 'oku 'ikai ko e 'uhinga´ ia.
'Oku 'ikai ko Tonga pe 'oku holo 'enau totongi´ ka 'oku fai pehee ki he ngaahi 'otu motu kehe e Pasifiki´. 'A ia ko e palani pe ia 'a e kautaha 'Ea Nu'usila´ ke holoki 'enau totongi´. Na'a nau 'uluaki kamata mei hono holoki e fepuna'aki fakalotofonua´, hoko ai e vaha'a 'o Nu'usila mo 'Aositelelia´ pea ko e Pasifiki´ 'oku nau hoko atu ki ai´.
Taimi tatau kuo tokolahi e kakai kuo nau fetu'utaki ki he 'Ea Nu'usila´ koe'uhi´ ko 'enau fea fo'ou mo ma'ama'a´. Ko e fea ko 'eni´ 'oku ta'efakangatangata hono taimi´ 'a ia 'oku $199 ki he tokotaha, pea 'oku 'ataa ki he tokotaha lahi mo e ki'i fanau 'e toko 2.
Na'e fakahâ foki 'e he pule lahi e Royal Tongan Airlines, Logan Appu ki he NZ Herald 'oku 'ikai kenau ofo nautolu he holo e totongi 'a e 'Ea Nu'usila´ ka kuopau pe kenau 'unu hifo 'enau totongi´ ke fe'auhi mo e 'Ea Nu'usila´.
Ko e me'apango e lau ko 'eni 'a Appu he 'oku kei tu'u pe e fu'u vakapuna 'a e Royal Tonga 'i he mala'e vakapuna 'Okalani´. Na'e pehee 'e puna he Tokonaki´ ka na'e 'ikai pe pea 'oku mei lava 'eni 'a e uike 'e ua 'ene tu'u´.
|
