|
Fokotu'u Tavake Fusimâlohi ke 'Etita 'i he Kele'a´
fa'u 'e Mateni Tapueluelu
NUKU'ALOFA: KUO fokotu'u 'a e Pule Lahi Mâlôlô 'o e Lêtiô mo e TV Tonga´, Tavake Fusimâlohi, ke hoko ko e 'Etita 'o e nusipepa Kele'a´ 'i hono toe fakahû tu'o ua e kole laiseni 'a e nusipepa´.
Na'e 'uluaki fakahû foki e kole 'a e nusipepa´ ni 'i he ta'u ni´ 'i he malumalu e 'Etita lolotonga´, Po'oi Pôhiva, pea ne 'ikai ke tali. Ko Tavake´ kuo ma'u 'a hono faka'ilonga ako 'i he Faiongoongo´, pule ta'u lahi 'i he Lêtiô Tonga´ pea toe Talêkita ta'u lahi foki 'i he Kautaha Ongoongo 'a e Pasifiki´ he ta'u 'e 12 'a ia 'oku 'iloa ko e PINA.
'Oku lolotonga fakaongoongo ai e nusipepa´ ki ha tali mei he Va'a Fetu'utaki 'a e Pule'anga´ 'a ia 'oku nau laiseni e nusipepa´.
Ko e nusipepa Kele'a´ ne fokotu'u mo fakalele ia 'e he Fakafofonga Fika 1 Kakai 'o Tongatapu´, 'Akilisi Pôhiva, 'i he 1983 hili hono ta'ofi 'ene polokalama he lêtioo´ ne ui ko e Matalafo - lau - kai´ pea fakanofo ai ia mei he ngâue´.
Na'e pehê 'e 'Akilisi kuo lahi 'ene fakamole 'i he nusipepa´ ni ka 'oku ta'efa'alaua 'ene 'aonga ki he kakai´.
'I he taimi tatau 'oku kei fakatatali mo e kole laiseni 'a e Niuvâkati´ 'a ia ko e nusipepa fo'ou ne fakahû fakataha mo e Taimi 'o Tonga´. Ne 'oatu foki 'e he 'Etita 'o e Taimi 'o Tonga´ ha'ane tali ki hono fakata'e'aonga'i ko ia 'e he Potungâue Fetu'utaki´ 'a e kole laiseni 'a e nusipepa Niuvâkai´ ka 'oku te'eki ke fai ha tali fakafoki mai.
|
