Ko e hâ leva e ngâue 'oku fakahoko?

"Kuo mau fekumi ki he fale'i fakalao pea ko e fale'i kuo mau ma'u´ te mau 'ave 'a e Siasi Tokaikolo´ ki he fakamaau'anga´. Ko e kuonga eni 'o e fakamatala´ pea 'e 'i ai e kakai Tonga tokolahi 'oku nau nofo 'i tu'apule'anga te nau fakakaukau'i pê 'e ma'u fêfê ha pa'anga mei he kakano 'o e Tohi Tapu´," ko e lau ia 'a e Sekelitali Seniale´, Solomone Duru mei Fisi.

"'I he'emau vakai´ ko e makatu'unga mo e taumu'a eni 'i he ngâue 'a e Tokaikolo´. Ko 'emau Kômiti Tohi Tapu Tonga´ 'oku tokanga 'aupito ki he âkenga ko eni´ pea 'oku mau kolênga´ ke mau ngâue fakataha ki ha Tohi Tapu pê 'e taha ma'a Tonga kotoa."

Na'e toe fakahâ foki 'e he Sekelitali Seniale´, 'oku teu paaki 'e he Kômiti Tohi Tapu 'a Tonga´ 'a e fanga ki'i Tohi Tapu iiki 'oku fa'ofa'o he kato´ 'i he ta'u´ ni. Pea 'i he ta'u fo'ou´ te nau paaki e fakalea fo'ou ki he Ongoongo Lelei´, pea 'i he 2006 'oku 'amanaki ke Tohi Tapu Ako (Study Bible) ko e fakamanatu ki he tokotaha totonu na'a´ ne liliu e Tohi Tapu´, Dr Moulton.

"'Oku mau lotomamahi 'i he Siasi Tokaikolo´ tautautefito ki he kau taki´ 'i he vaa'ihala 'oku fili´. Ko 'enau me'a kuo fai´, kiate kimautolu, 'oku hangê ia ha taha nofo totongi kuo´ ne fakalelei'i e fale´ pea tala 'e ia ko e fale´ kotoa 'oku 'a 'ana ia. Ko e Tokaikolo´ 'oku hangê ha taha nofo totongi 'oku´ ne feinga ke hoko ko e 'Eiki Ma'utofi'a (Landlord) 'o e kakano e Tohi Tapu´.

"Ko ha fa'ahinga kakai sivilaise pe Kalisitiane pê, 'e 'ikai ke nau tala ko ha'anau koloa ha koloa 'a e kakai kehe ia he 'oku ta'efakalao."