'Ave Sosaieti Tohitapu e Pasifiki´ e Tokaikolo´ ki he fakamaau'anga´
Lotomamahi Sekelitali Seniale Sosaieti Pasifiki he Tokaikolo´
fa'u 'e Mâteni Tapueluelu

NUKU'ALOFA: 'OKU te'eki ke fakapapau'i e ola 'o e ngâue 'oku fai fekau'aki mo e hiki tatau ko ia 'e he Siasi Tokaikolo´ e Tohi Tapu Tonga´, ka kuo fakapapau'i 'e he Sekelitali Seniale 'o e Sôsaieti Tohi Tapu 'o e Pasifiki´, Rev. Solomone Duru, ki he Taimi 'o Tonga´ 'oku nau lotomamahi 'i he founga hiki tatau'aki 'e he Siasi Tokaikolo´ 'a e Tohi Tapu Tonga´.

Koe'uhi´ kuo lahi e fetu'utaki mai ki he nusipepa´ ni fekau'aki mo e kaveinga´ ni 'oku 'oatu fakaikiiki ai e fakamatala´ ni. Ko e Tohi Tapu Kâtoa´ na'e liliu Tonga ia 'e Dr Molitoni pea fakatatau ki he fakamatala 'oku ma'u 'e he nusipepa´ ni na'a´ ne foaki mo hono fâmili´ e Tohi Tapu´ ki he Soaieti Tohi Tapu 'a e Pasifiki´ 'a ia 'oku 'ulu 'i Fisi´. Ko honau Va'a pê eni 'i Tonga 'oku ui ko e Sosaieti Tohi Tapu Tonga´. Ko e anga maheni´ ko ha hiki tatau 'o e Tohi Tapu Tonga´ 'i Fisi 'oku nau fakahâ mai ki he Va'a e Sosaieti Tohi Tapu Tonga´ 'a ia ' oku Sea ai 'a Faifekau Lôpeti Taufa´.

'I ha fetu'utaki 'a e nusipepa´ ni kia Faifekau Lôpeti Tâufa na'a´ ne fakahâ 'oku fai 'a e ngâue ka 'oku te'eki ke fakamafai'i ia mei he Sekelital Lahi 'o e Sosaieti Tohi Tapu e Pasifiki´ 'i Fisi, Solomone Duru, ke ne fakahâ ha fakamatala ki he mîtiaa´. Ka na'a´ ne fakahâ pê 'oku 'ikai ke kau kotoa e ngaahi siasi Kalisitiane 'i Tonga´ ki he Va'a e Sosaieti Tohi Tapu 'i Tonga´ ka ko e konga lahi 'oku nau kau ki ai pea ko ia 'oku Sea´.

Kaekehe, 'i he ta'u kuo 'osi´ na'e feinga ai e Siasi Tokaikolo´ ki he Sosaieti Tohi Tapu 'a 'Aositelêlia´ ke nau hiki tatau e Tohi Tapu Tonga´ ma'a kinautolu ko e konga 'enau kâtonga ne fai 'i Tîsema ta'u kuo'osi´. Na'e fale'i 'e he Sosaieti Tohi Tapu 'Aositelêlia´ ke nau fetu'utaki mo fengâue'aki mo e Sosaieti Tohi Tapu Fisi´ he ko kinautolu 'oku nau ma'u e totonu ki hono pulusi´ (copy right).

Na'e kamata leva e fengâue'aki 'a e Tokaikolo´ mo Fisi 'i Fepueli ta'u kuo 'osi´. Ne fiema'u 'e he siasi´ 'a e tatau 'e 15,000 'i he mahu'inga ko e $10 ki he taha. 'I he fakamatala kuo ma'u 'e he nusipepa´ ni ne fakafuofua e mahu'inga fakakâtoa´ ki he US$148,000.

Na'e tui 'a Fisi ka toe fakapâ mai ki Tonga´ ni 'e tuai ia pea ne nau kamata'i e ngâue´ mo fakakaukau te nau toki fakalotolahi'i 'a Tonga ke nau poupou pê ki he ngâue´ ni. Ne nau kole leva ki he Siasi Tokaikolo´ ke totongi ha vahe tolu 'e taha 'o e mahu'inga fakakâtoa´ ka ne 'ikai hoko. Ne kole e siasi´ ke fakahoko mu'a e ngâue´ kae toki totongi 'a muiange he 'oku fihia e silini´ 'i he 'akauni 'i 'Amelika.

Fakatatau ki he fakamatala 'oku ma'u 'e he nusipepa´ ni, fakafuofua ki Siulai, ne totongi ai 'e he siaisi´ e pa'anga 'e US$10,000 'a ia ko e mahu'inga pê ia 'a hono hiki tatau (scanning, editing and proof reading) . Ne fiema'u 'e he kau paaki´ ia ke 'uluaki totongi ha pa'anga 'e US$98,000 kae toki kamata e paaki´. Ne a'u ki Nôvema 'oku te'eki ke paaki e Tohi Tapu´ ka kuo panaki e kâtoanga´ pea ne kole ai 'e he kautaha 'i Fisi´ ke toloi e kâtoanga´ pe ko hono paaki pê ha konga 'o fakapuna mai ki Tonga´ ni.

Ne 'ikai fiemâlie ki heni e siasi´ pea ne nau 'ave ai e tatau (text) ne 'osi hiki´ (scan) 'o paaki ia 'i 'Initia.

Ka na'e anga fêfê 'a hono ma'u 'e he Tokaikolo´ e tatau 'o e kakano e Tohi Tapu´ pea nau toki ô mo ia? 'Oku 'ikai fu'u mahino pau eni kae fakatatau ki ha fakamatala 'a e Sekelitali Seniale e Sôsaieti Tohi Tapu 'a e Pasifiki´, Rev. Solomone Duru, ki he Taimi 'o Tonga´ 'aneafi, 'oku nau mâ 'i he founga ne ma'u 'aki 'e he Tokaikolo´ 'a e tatau e kakano 'o e Tohi Tapu´, "ta'e te nau fakangofua pea nau paaki 'i honau hingoa´ pê."