Ngali ko e ta'u 'eni 'o 'Epalahame Lauaki

KO E misi ia 'a e tokotaha va'inga 'akapulu liiki kotoa pe 'i Nu'usila ni ke ne kau he timi NZ Warriors pea ko e timi fakafonua Kiwi 'a Nu'usila ni.

Kimu'a he kamata 'a e fe'auhi NRL 'a 'Aositelelia ki he ta'u ni 'a ia ''oku kau atu ki ai e timi liiki pe 'e taha mei Nu'usila ni koe Warriors na'e fakahoko ai ha ngaahi tau fakaangaanga kimu'a he fe'auhi´. Ko e ngahi tau 'eni na'e hanga ai 'e he kau faiako 'o e ngaahi timi liiki´ 'oku kau ki he fe'auhi NRL 'o tesi'i mo siofi 'enau kau va'inga fo'ou mo kei 'alu hake´.

'I he timi 'a e Warriors na'e kau atu ki ai e ongo talavou Tonga ko Manu Vatuvei pea mo 'Epalahame Lauaki. Ka 'i he uike ni kuo 'asi e ngaahi faka'ilonga mei he kemi 'a e Warriors ngalingali kuo sila'i 'e 'Epalahame ia hono sea ki he timi 'o e ta'u ni.

Ko e talavou ni 'oku 'ai ai 'ene sino lahi mo fefeka´ mo mahino mai 'oku toe vave pea kei si'i foki. Na'a ne kei 'i he kolisi´ he ta'u kuo 'osi´ pea ne va'inga ai he timi 'a Glenora Bears 'i he fe'auhi Bartercard pea ne kamata mei ai hono fakatokanga'i´. Na'e kamata leva hono fehu'ia 'e he kau faifili 'a e Warriors mo nau fehu'i kohai e tama´.

Ko 'Epalahame´ na'e fanau'i ia 'i Tonga pea ne hiki mai mo hono famili´ 'i hono ta'u 5 ki Nu'usila ni. Na'a ne va'inga hake he ngaahi timi 'a e fanau iiki´ 'i Waitemata mo Te Atatu 'o a'u ki he'ene hu ki he Kolisi Kelston Boys. Ko e 'apiako ni 'oku 'iloa ia ko e kolisi 'akapulu 'iunioni 'a ia ne ha'u mei ai e tokolahi 'o hangee ko Sam Tu'itupou mo hai fua. Pea ko e kolisi ia na'e 'asi hake ai 'a e taleniti faiako 'akapulu e faiako 'a e All Blacks he taimi ni, Graham Henry.

Lolotonga e 'i Kelston 'a 'Epalahame´ na'e fili ai ia ki he timi 'akapulu 'iunioni kalasi 'uluaki 'a e kolisi´ 'o ne va'inga tu'o taha ai ma'ae kolisi. Ka ne ala atu e nima ia e Warriors he taimi ko ia´ 'o hamusi mai ke ne fakamo'oni he aleapau va'inga mo ia ke ne kau he timi fakalakalaka 'a e Warriors. Ko e tupu'anga ia 'o e situ'a 'a 'Epalahame mei he 'iunioni´.

Kaekehe koe'uhi´ ko e lavelavea´ e ni'ihi he Warriors ngalingali koe faingamalie 'eni 'o 'Epalahame ke ne hu ai ki he timi´ neongo 'e talifaki he taimi lahi.

'I he taimi tatau kuo 'asi hake e ta'okete 'o 'Epalahame´, Sione 'i he 'akapulu 'iunioni´ mei he timi Super 12 'a Waikato . 'I he fo'i tau 'e 2 ko 'eni 'a Waikato he ta'u ni ko e 2 ai pe ia e tata'o 'a Sione neongo ne toki hu talifaki mai pe. 'Oku lahi e ngulu ia pe ko e ha 'oku kei fakatalifaki'i ai ia´ kae hili ko ia´ 'oku fu'u kalasi 'ene lele'i pulu´ mo e tali tangata´ he ongo fo'i tau 'e ua kuo fakahoko´.

Kaekehe fakatatau ki he fakamatala 'a 'Epalahame´ na'a na fakatou va'inga liiki loua pe mo Sione. Ka ne tafoki 'a Sione ia ''o 'alu ki he 'Iunioni´ kae hoko atu pe ia he liiki´ neongo ko 'ene kei ako´ na'e fa'a ki'i va'inga 'iunioni ai.

Na'a ne pehee ko 'ene ongo matu'a´ 'oku na takitaha e manako he ongo 'akapulu´ ni. 'Oku manako 'ene tangata'eiki´ 'a'ana, Kepu ki he 'akapulu 'iunioni´, kae manako 'ene fa'ee 'a'ana, Mele he 'akapulu liiki´. Na'a ne pehee ko e taimi ko ia 'oku na tau meimei taimi taha ai mo Sione´ 'e 'alu leva e taha he'ena ongo matu'a´ 'o siofi e tau 'a Sione pea 'alu e taha 'o sio he'ene tau´.

Kaekehe neongo 'oku te'eki ke ui e sikuati totonu 'a e Warriors ki he ta'u ni ka 'oku mahino 'e fakafekiki 'a 'Epalahame mo e kau tangata 'iloa he Warriors hangee ko Ali Lau'iti'iti, Wairangi Koopu mo Awen Guttenbeil. Ka pehee tokaange ha taha 'e teke'i ia 'e 'Epalahame mei hono sea´ pea 'oku 'osi mahino pe ki he toenga e ngaahi timi´ kuopau kenau fai honau leleitaha´ he ka 'ikai 'e teke'i nautolu 'e 'Epalahame pea pehee ki he toenga 'oku nau talitali hake´ hangee ko Manu Vatuvei.