Steve Kefu ko e helo ia 'a Kuinisilani 'i he uike ni´

NA'E hangee e hu atu 'a e sekeni 'a Queensland Reds, Steve Kefu ki he'enau timi´ ha hu atu 'a e Fakamo'ui´. Hili hono lali nautolu 'e he timi 'a e Otago Highlanders he uike kuo 'osi´ 'aki ha kai lahi 'a ia ko e 38 - 8.

Na'e 'ikai foki ke kau 'a Steve ia he fuofua tau´ tupu mei he hangee ne ki'i pâkalava hono fa'ahi mata to'omata'u´. Pea ne fakafolo'aki ia ha fo'i'akau 'oku kau ia he kalasi 'oku leipolo'i ko e faito'o konatapu´.

Na'e hoko heni ha longoa'a ka ne faka'atâ 'a Steve ia 'e he 'Iunioni 'akapulu 'a 'Aositelelia´ ke ne va'inga. Na'e fili leva ia 'e he faiako 'a Kuinisilani ke ne tau he efiafi Tokonaki´ neongo 'oku te'eki ke sai lelei hono mata´ he ne kei faingata'a pe ke malimali.

Kaekehe 'i he hili pe e sekoni 'e 24 mei he puhi 'a e fakamâau´ he kamata e tau 'a Kuinisilani mo e Waikato Chiefs kuo tokoto atu 'a Steve ia he laine tata'o 'a e Chiefs mei ha'ane fo'i lele malie mita nai 'e 30. Ne 'ikai ke fuoloa he ne te'eki ke lava ha miniti 'e 8 mei ai kuo toe fo'ohifo atu 'a Steve ia he laine tata'o´ 'o taki ai 'a Kuinisillani ko e 12 - 3 'a e Chiefs.

Ne fêhalaaki heni e 'amanaki 'a e tokolahi koe'uhi´ ne nau sio nautolu ki hono uipi 'e he Chief 'a Uelingatoni he uike kuo 'osi´ pea tâ lahi 'e Otago 'a Kuinisilani´ pea nau pehee 'e nautolu 'e lali faingofua 'e he Chiefs 'a Kuinisilani. Ka ko e pango he ne hu mai 'a Steve ia 'o taki'i hono fakafehalaaki'i e 'amanaki 'a e Chiefs mo 'enau kau poupou´. Ne toe 'asili ai´ ko e tali tangata ia 'a Steve ne fu'u kalasi 'aupito ia.

Kaekehe ne iku 'a e fetulituli'i e kai´ 'o toki tuki tapuni 'e he kapakau 'iloa 'a e Wallabies, Wendell Sailor e puha mate 'o e Chief mei ha'ane fo'i tata'o faka'osi 'o nau ikuna ai ko e 39 - 25.

Mei he timi 'a e Chief ne mâlie 'aupito e va'inga ia 'a Sione Lauaki mei ai´ neongo na'e toki hu talifaki mai pe. He na'e 'ikai ke toe ha tapa he mala'e´ 'ene 'asi ai mo 'ene ngaahi lele'i pulu fefeka´. Ne kau heni e laku atu 'a e tautua'aa ia 'a e Chiefs 'oku 'osi tu'u mai 'a Sione ia he tautua'aa´ 'o ne tui'i atu ai pe 'a Wendell Sailor 'o ne tokoto he laine tata'o 'o tata'o.

Kuo tu'o 2 'aki pe 'eni 'ene tau mo 'ene tata'o ai pe 'e ua pea 'oku 'ikai ke 'ilo pe ko e haa 'oku kei fakatalifaki'i ai´.