Kalokalo 'a Jones mei he faiako he timi Pasifika´

KUO kalokalo 'a e peleki'auei talâ 'a e All Blacks mo mamani ko Michael Jones mei he lakanga faiako ko ia 'a e fuofua timi fakatahataha 'a e Pasifiki´ ke tesi mo e All Blacks, Wallabies mo e Springboks he ta'u ni.

Na'e pehee 'e Jones ko e me'a oku mu'omu'a kiate ia he taimi ni 'uluaki´ ko hono famili´ pea ko e ua´ ko 'ene ngâue 'i he Auckland University of Technology 'a ia 'oku ne ngâue ai ki he tafa'aki e fanau ako mei he Pasifiki´.

Ko Michael Jones foki ko e tangata le'olahi he'ene teke mo feinga ko ia ke 'ilo'i mo fai ha ngâue ki he 'akapulu´ mo e kau va'inga 'akapulu he 'otu motu Pasifiki´.

'Oku toe tukuaki'i foki ia 'oku pea na'e 'i ai 'ene kaunga ki he alea ko ia 'a e kautaha Cullen Sports 'a e milionea ko ia ko Eric Watson ke fokotu'u ha timi Super 12 'a e Pasifiki´.

Na'e pehee 'e Jones 'oku sai ange kiate ia ke ne ngâue ma'ae kakai he 'otu motu Pasifiki´ 'i he mala'e 'o e ako´ 'i he 'akapulu´.

Na'e poupou'i foki 'e Jones 'a e fokotu'u ko ia 'a e Cullen Sports ke 'ai ha timi Super 12 'a e Pasifiki´, tokua ko e solova'anga 'eni e palopalema 'oku lolotonga fekuki mo e 'akapulu´ he 'otu motu Pasifiki´. 'E tafe heni 'a e seniti ki he ngaahi komiti 'akapulu 'a Tonga , Fisi mo Ha'amoa´. 'Ikai ke ngata ai´ kae toe 'asi mo 'iloa ai e kau va'inga Pasifiki´ 'o tukukeheange 'a e fekefeka 'enau ualeti´.

Na'e pehee 'e Jones 'oku sai e fo'i 'aliaki 'a e Cullen Sports he 'oku ne fafangu 'e ia e ngaahi timi lalahi mo hau 'o mamani´ kenau 'ilo e mahu'inga 'o e kau va'inga 'akapulu he Pasifiki´. Ko e ta'u 'ee 'e fiha 'enau kalanga mo 'enau sio kehe pe. Ko 'eni ko e hu mai pe 'a e Cullen Sports 'o feinga ke fakalele e timi Super 12 'a e Pasifiki´ kuo 'oho 'a Nu'usila mo e ngaahi fonua´ 'o fakaanga'i.

Kaekehe koe'uhi´ ke ma'u ha paasi 'a e Cullen Sports ke ne fakalele ha timi Super 12 'a e Pasifiki´ kuopau ke ma'u e ngofua ia ko ia´ pea tali 'e he ngaahi 'Iunioni 'akapulu 'a Nu'usila, 'Aositelelia mo Saute 'Afilika 'oku 'iloa ko e (SANZAR).

Ko e Cullen Sports koe kautaha ia 'a e tangata milionea Nu'usila ko Eric Watson pea 'oku ne ma'u 'e ia e peseti 'e 75 e timi liiki 'a e NZ Warriors. 'Oku pule lahi he Cullen Sports mo e Warriors 'a Mick Watson.