Kamata teuteu timi volipolo 'a Tongá ki he fe'auhi Oseniá
Fa'u 'e Tevita K. Takitaki

NUKU'ALOFA- 'Oku 'ikai ko e timi fuhu pe 'a Tongá 'oku nau teuteu atu ki he fe'auhi 'a e 'Oseniá ka 'i he volipoló 'oku nau hanga atu mo kinautolu ki he fe'auhi 'a e 'Osenia 'a ia 'oku teu fakahoko ki Tahiti 'i Mê.

Kuo fakahâ ai 'e he faiako 'o e timi volipolo fakafonua 'a Tongá, Hans Jensen 'a 'ene sikuati kenau teuteu ki he fe'auhi mahu'inga taha ki he sipoti ni 'i he 2004.

'I he fânau fefine 'oku kau kiai 'ae kau tautehina Takai mei Kolonga 'a ia ko'Amelia, Lupe mo Tangakina Takai, Puataisia Kefu, Catherine Tongotongo, Uina Paea, 'Ana Lama, Line Paea, Cathy Fotu, Selu 'Aholelei, Vika Koloa, 'Ivi Kakato, Seketi Fatai, 'Isita Naufahu, Sepiuta Tautua'a, Maletâ Naufahu, Sulia Fe'ao, Tania Suka, 'Ofa Tâkapu mo Losina Sekona.

'I he fânau tangata 'oku kau kiai 'a e ongo tangata na'a na metali siliva 'i he fe'auhi volipolo mâtâtâhi 'i he fe'auhi sipoti 'a e Pasifikí, Ti'o Fonohema mo Soane Vaipulu pea kau kiai 'a 'Amanaki Fifita, Kama Manulevu, Solomone Palu, Telua Tu'i, Sione 'Ahoafi, 'Asu Vaitaki, Sione Fatai, 'Aisake Havea, Fakapulia Puluno, Samuela Fotu, Matiu Tu'utafaiva mo Talanoa Oleva.

Na'e fakahâ foki 'a Hans 'oku kei 'i ai pe 'a e fainghamâlie ki he ni'ihi koia 'oku 'ikai 'asi honau hingoa 'i he sikuatí ka kuo pau pe kenau kau ki he sivi faka'osi 'a ia 'e fakahoko ki he fale mamata'anga sipoti 'i 'Atele 'i he Tokonaki kaha'u.

'Oku 'i ai foki 'a e faka'amu 'a Hans ke fetu'utaki ange kiai 'a e fânau Tonga 'oku nau va'inga volipolo 'i tu'apule'anga ke ma'u ha timi lelei 'a Tonga kene fakafofonga'i lelei 'a e fonuá.