Fika 'uluaki Vika Lolo he tolo me'amamafá 'i 'Aositelêlia
Fa'u 'e Moeke Moala

SENE: "Na'e kouna au 'e he'eku fa'ê ke u fai 'a e sipoti tolo me'amamafá" ko e lau ia 'a Vika Loló. Ko e anga ia e manatu 'a e ki'i finemui Tonga ta'u 14 ko 'ení 'a e tu'unga 'ene fakahoko 'a e sipoti tolo shot-put pea mo e discus, ko hono fakalotolahi'i ia 'e he'ene fine'eikí ke ne fai 'a e sipoti ko 'ení talu mei hono ta'u 9. Ko Viká ko e 'ofefine ia 'o Hiki mo Fasi Lolo mei Tempe pea 'okú ne lolotonga ako 'i he 'apiako Tempe Languages High School .

'I he sipoti fakata'u ko ia 'a e ngaahi akó ko e IGA Australian All Schools Athletics Championships, na'e fakahoko 'i Brisbane he ngaahi uike si'i kuo hilí na'e fakatou ikuna'i ai 'e Vika Lolo 'a e fe'auhi tolo shot-put pea mo e discus. Na'e fe'auhi 'a Vika he kalasi si'i hifo he ta'u 16 ka 'okú ne kei ta'u 14 pê. Ko e lelei taha 'ene toló, 'i he shot-put ko e mita 'e 14.53m pea 'i he tolo discus ko e mita 'e 41.49m.

Na'e talu e kau 'a Vika he fe'auhi tolo me'amamafá 'i hono ta'u 9 pea na'e kamata ai pê 'ene 'iloa he sipoti ko 'ení 'i he fe'auhi 'a e ngaahi akó pea mo e fe'auhi faka-kalapú, 'o a'u ai pê ki he'ene fakafofonga'i 'a e Vahe Niusauelé 'i he fe'auhi sipoti fakakâtoa 'a e ngaahi ako 'i 'Aositelêliá. Na'e kamata 'a hono teu'i 'o Viká 'i he kalapu sipoti 'a e Randwick Little Athletics 'o a'u mai ai pê ki he 'ahó ni.

'Oku tokoni lahi foki 'a e 'apiakó ki hono fua 'a e ngaahi fakamole 'a Vika ki he'ene folau holo he ngaahi fe'auhí, 'o a'u ki he'enau feinga pa'anga pê 'i he 'apiakó ke tokoni'i 'a Vika tu'unga 'i he'enau mahu'inga'ia 'i he talêniti 'oku ma'u 'e he ki'i ta'ahine ko 'ení. 'Oku poupou lahi 'aupito 'a e 'apiakó fakataha mo e fâmili 'o Viká ki hono teu'i hono kaha'ú 'i he sipoti ko 'ení.