Fakatau 'e he Warriors e Manu Samoa´

'OKU 'amanaki ke fakakakato he uike ni 'a e aleapau ko ia 'a e 'Iunioni 'Akapulu 'a Ha'amoa´ mo e kautaha Cullen Sports ki hono fakatau 'e he kautaha ni 'a e Manu Samoa 'a Ha'amoa´ ki he $5 miliona.

Ko 'ene lava 'a e alea ko ia´ 'e fakalele leva 'e he kautaha ni Manu Samoa pea nau fakahoko mo hono fakapa'anga 'o e timi ni. 'I he taimi tatau 'oku lolotonga 'i Nu'usila ni mo e pule lahi 'a e 'Iunioni 'Akapulu 'a Tonga´, Sakopo Lolohea pea 'oku fai 'e he Cullen Sports 'a e alea tatau mo Tonga ka ne te'eki ke fakapapau'i 'a e alea ko ia´.

Ko e kautaha Cullen Sports ko e kautaha ia 'a e tangata milionea Nu'usila ko Eric Watson 'a ia ko ia 'oku ne ma'u'a e peseti 'e 75 mei he timi liiki 'a e NZ Warriors. 'Oku lolotonga fai 'ene feinga ke fokotu'u ha timi Super 12 'a e Pasifiki´, ka koe'uhi´ngalingali 'e fakafepaki'i 'e he 'iunioni 'akapulu 'a Nu'usila´ mo e ngaahi timi kehe´, kuo ne toe to'o ai mo e Manu Samoa´ ko e taha ia e hala faingofua ke fokotu'u ha timi Super 12 'a e Pasifiki´ pea 'oku kei alea ia mo e 'iunioni 'a Tonga mo Fisi´ ki he tila tatau.

Ko e ngaahi alea ko 'eni´ 'oku taki ia 'e he pule lahi e kautaha Cullen Sports mo e NZ Warriors ko Mick Watson ( 'oku kehe 'eni ia mei he milionea ko Eric Watson 'oku 'a'ana e kautaha´).

Ka lava 'a e alea ko 'eni´ ka toe 'i ai ha me'a 'i he kaha'u´ fekau'aki mo e 'akapulu´ 'i Ha'amoa mo e ngaahi fonua e Pasifiki´ 'e 'ikai leva ke toe fetu'utaki e 'Iunioni 'akapulu ia 'a Nu'usila mo 'Aositelelia´ hangatonu ki he ngaahi 'iunioni 'a e ngaahi timi kehe´ ka kuopau ke fou kotoa ia he kautaha Cullen Sports 'a ia 'e pule'i mo fakalele ia 'e Mick Watson.

Ko e taha e ngaahi alea 'a e Manu Samoa´ mo e Cullen Sports ko e pau ke fokotu'u ha senitâ ako 'akapulu´ 'i Apia ke teuteu'i ai e fânau va'inga fakalotofonuá pea ke kau atu mo kinautolu ne fanau'i 'i Nu'usila ki he 'apiako ni. 'E ako'i ai nautolu ki ha tu'unga 'e fakapolofesinale ange ai e va'inga´ pea he'ikai leva kenau toe aleapau va'inga mo Nu'usila ka kenau nofotaha ki he Manu Samoa´.

Ko e senitâ ako ko 'eni´ 'e fakalele mo tataki ia 'e he faiako lolotonga 'a e NZ Warriors ko Daniel Anderson. Na'e pehee 'e Mick Watson ko e founga tatau 'oku fakalele'aki fakatekinikale e NZ Warriors 'e fai ia he 'apiako ni. Pea 'oku fai e palani ke fokotu'u mo ha senitâ ako 'akapulu pehee 'i Tonga mo Fisi pea 'e a'u ko ia ki he 'ai e timi fakatahataha 'a e Pasifiki´ kuo mateuteu e fânau va'inga ne ohi hake he ngaahi senitâ ako´ ni.

'Oku pehe ni foki hono fakalele e Warriors 'a ia 'oku 'i ai e Junior Warriors pea 'i ai mo e sikuati fakalakalaka 'o toki unu tahataha hake mei ai e kau va'inga kenau leleaki'i e fuka 'a e Warriors. Pea koe'uhi´ ko e ola lelei e sisitemi ko ia´ he Warriors 'oku tui e tokolahi ka toe hu mai e Cullen Sports 'o toe fakalele pehee mo e 'iunioni´ he Pasifiki´ 'e houtamaki 'aupito 'a e timi ia ko ia´.

Na'e fakahâ fiefia 'e he pule lahi 'o e 'iunioni 'akapulu 'a Ha'amoa´, Saipele Esera 'oku nau fiefia he hu mai 'a e Cullen Sports 'o hakeaki'i e 'akapulu´ hono fonua´. Kuo fuoloa hono teketeke'i holo nautolu 'e he ngahai fonua hau mo tu'umalieange´ ka 'i he hu mai 'a e Cullen Sports he'iaki ke toe lava e to'onga fakaaoao ko ia´ 'o toe fai. Na'a ne fakaha 'ene fiefia he 'oku kau 'a Tonga mo Fisi he monu'ia ko 'eni´.

'Oku 'amanaki ke fakahâ 'e he Warriors 'a 'enau tokoni $1 miliona he ta'u ke fakalele'aki 'a e Manu Samoa´ he uike ni.

Ko e Manu Samoa na'e 'uluaki fakapa'anga ia mo fakalele 'e he milionea ko Sir Michael Fay ka 'i he hu mai ko 'eni 'a e Cullen Sports 'oku pehee 'e kei kau pe 'a Fay he ma'u 'inasi he Manu Samoa´.

Fekau'aki mo e timi fakatahataha 'a e Pasifiki´ 'oku fakafuofua 'e ui ki ai ha sikuati 'e toko 26 pea 'i he'ene tu'u pehee 'e totongi lelei'iange 'e Eric Watson ia e kau va'inga ko ia´ 'i he totongi 'a e kau va'inga Super 12 he taimi ni. Ko e totongi 'a e kau va'inga Super 12 he taimi ni 'oku 'avalisi ki he $65,000 ka 'i he tui 'a Eric Watson 'e lelei ange 'ene kau va'ingá.