Alapama 'a e tangata DJ 'iloa

HILi ha ta'u 'e 14 'a e ngâue ta fasi pe DJ 'a e matâpule Tonga ko ia ko Soane Watkins 'i loto 'Okalani´ na'e tuku atu leva he uike kuo 'osi´ 'a 'ene fuofua 'alapama 'a ia 'oku 'iloa ko e Tongan Chic 'a ia 'oku 'i ai ha fo'i fasi 'e 14.

Ko Soane´ 'a ia 'oku toe 'iloa pe ko DJ Soane 'oku 'ikai ko ha taha musika ia 'o fakatatau ki he'ene fakamatala´. 'I he 1987 na'a ne ngaue le'o pe security ai 'i he taha e ngaahi paa 'iloa 'o loto 'Okalani ko e Club Roma. Pea ne kamata heni 'ene manako ki he DJ koe'uhi ne tu'o taha he uike na'e hanga ai 'e he kau pule e paa´ 'o faka'ataa ia ke ne ta fasi. Na'e kamata mei ai 'ene manako ki he ngâue ni pea ne 'iloa ia he taimi ko ia´ ko Big Daddy. Na'a ne taa 'a e ngaahi fasi 'oku manako ki ai e to'utupu´ hangee ko e hip hop, funk & soul.

Ne 'alu pe e taimi´ mo e taukei ange 'a Soane´ pea ne hoko ai ko e taha e kau DJ 'iloa taha 'o loto 'Okalani´. 'Oku 'iloa foki ia ki he'ene hanga 'o tanaki mo filio'i (Remix) e ngaahi fasi 'a e kau hiva 'iloa 'i Nu'usila ni hangee ko Che-Fe, King kapisi, Bic Runga mo Annie Crummer.

'I he fa'ahinga ngâue ni na'e fa'a 'ahia mai ai 'a Nu'usila ni 'e he kau DJ mei Pilitania 'o nau feohi mo Soane 'o a'u ki ha tu'unga fakapolofesinale mo'oni. Na'e tupu mei heni 'a e fakakaukau 'a Soane ke ne fa'u ha'ane fo'i 'alapama pe 'a'ana. Na'a ne ngâue ai he ta'u 'e 2 hono fa'u he komipiuta´ mo fakafasi 'u fasi ni 'o toki lava ai 'o ma'u e Tongan Chic.
"'Oku 'ikai ke u lava 'e au 'o lau e musika´ pea ko hono mo'oni´ 'oku 'ikai ko ha taha musika au ia," ko e lau ia 'a Soane´. Ka na'a ne pehee ko e tu'unga fakapolofesinale ko ia e me'angâue´ mo e tekinolosia e taimi ni 'oku ne tui 'oku 'ikai ke toe fiema'u ia pe te te poto he musika´ pe 'ikai. Ko 'ene kamata'i pe 'e ia ha fo'i fasi pea ne toki filio'i ai pe he komipiuta´ mo fai ai hono fulifulihi 'o lava e fo'i fasi lelei 'aupito ia.

'Ikia ke ngata ai na'e toe kumi fale'i e tangata ni ki hono kaungâ ngâue DJ pe ko e ha 'enau lau´ pea 'oku ne fai leva hono fakalelei'i 'ene fasi´'o fakatatau ki he fakaanga 'a e kau DJ.

Kaekehe ko e fo'i 'alapama ni fakatatau ki he fakamatala 'a Soane ne malava ia tupu he poupou 'a hono famili´. Ko e takafi ko ia e fo'i 'alapama´ koe fa'u ia 'e he tamai 'i he fono 'a Soane´. Pea ko e fo'i fasi 'uluaki´ 'oku 'iloa ko e Not Without You ko 'ene fa'u ia ki hono mali´, Esther 'i hono 'aho fa'ele'i´, pea koe fo'i hiva 'e taha ko e Song for Sesilia´ ko 'ene fa'u ia ki hono 'ofefine ta'u 1 ko Sesilia.

Ko e ngaahi fasi 'i he 'alapama ni 'oku filio'i hono ngaahi ongo´ 'o fakatatau ki he manako 'a e tangata ni. 'Oku 'i ai 'a e Jazz, fasi tau'olunga mo e ngaahi sitaila faka-Latina´.