Na'e manako pe 'a Dave ki he hiva´

'I HA fepotalanoa'aki 'a e nusipepa ni mo e fine'eiki 'a Dave 'Otuhouma´, Elsie na'a ne pehee ko Dave na'e tupu hake pe ia 'o nau fakatokanga'i hono taleniti hiva´.

"Na'a ne fu'u manako 'aupito ki he hiva´ talu mei he'ene kei si'i´...pea 'oku ne toe kau foki he hiva 'a e siasi´," ko e lau ia 'a Elsie. Na'a ne pehee na'a nau 'uluaki siasi Metotisi pea ko 'eni kuo nau tafoki 'o Mamonga pea 'oku kau fefeka 'aupito 'a Dave he kau hiva he lotu´.

Na'e kau fakataha atu 'a Dave mo hono ki'i tehina ko John mo ha toko 3 kehe 'a ia ne nau fa'u e kulupu hiva le'o 'ata'ataa ta'etokoni'i 'e ha me'alea ko e F.Y.V.E (Five Young Vocal Extreme). Ko e kau hiva ni na'a nau 'osi 'asi he polokalama TV Showcase pea pehee ki he fe'auhi SmokeFree.

Na'e pehee 'e Elsie 'a ia ko e fefine Mauli, ko e taimi ko ia na'e tu'uaki mai ai 'a e fe'auhi NZ Idol ko e tuofefine 'o Dave ko 'Amelia na'a ne teke ia ke 'alu 'o kau he fe'auhi´. Ne nau fakalotolahi kotoa atu ki ai pea fili ai 'a Dave ke 'alu 'o kau pea ko e tu'u he taimi ni 'oku nau fiefia lahi he tu'unga kuo ne a'u ki ai´.

Ko Dave na'e matapule lahi he 'apiako Tamaki Intermediate pea ne toe matapule lahi pe foki he 'apiako Tamaki College. Na'a ne fa'a hiva he ngaahi feinga pa'anga 'a e Kolisi Tamaki´ ke tokoni ki he timi 'akapulu kalasi 'uluaki 'a e kolisi´.

Ko Dave ko e lahitaha ia he fanau 'e toko 4 'a Elsie mo Timote Hausia 'Otuhouma. 'Oku ne mali mo Natasha pea 'oku na nofo Howick.