Hu 'a Dave ki he toko 10 tu'ukimu'a he NZ Idol
Fa'u 'e 'Ulu'alo Po'uhila

KO E taha e ngaahi polokalama TV manakoa taha 'e he to'utupu´ 'i Nu'usila ni he taimi ni 'a e NZ Idol pea ko e tokolahi 'oku 'ikai kenau teitei 'ilo 'a e fânau Tonga 'oku nau kau atu ki ai´.

'I he uike ni na'e fili'i ai e matapule ko Dave Houma 'a ia 'oku 'iloa ko David 'Otuhouma mei 'Uiha/Kolonga ka 'oku nau nofo Panmure ki he toko 10 tu'ukimu'a taha 'o e fe'auhi ni. 'E toki fai leva hono filifili mei ai pe kohai e tu'ukimu'a taha´ 'o 'oange leva kiate ia e pale ko e fuofua NZ Idol ia.

Ko e fe'auhi ni ko e muimui ia 'a Nu'usila ni 'i he polokalama Idol 'oku fakalele 'i he ngaahi fonua kehekehe hangê ko 'Amelika, Pilitania, Netherland, 'Aositelelia mo fe fua. Pea ne kau 'eni he polokalama manakoa lahi 'aupito pea kuo fakakaukau ai e TV 2 'a Nu'usila´ ke fakahoko ha polokalama tatau 'i Nu'usila ni.

Ko e pale ki he tokotaha te ne ikuna e NZ Idol ko hono fa'u 'e he kau mataotao he musika´ mo fakapa'anga 'ene fuofua 'alapama hiva´. Pea 'e toki tanaki atu ki ai mo e ngaahi pale kehekehe pea tukukehe ange 'ene 'iloa´.

Ko ia na'e tu'uaki e fe'auhi´ ki ha taha pe 'e fie kau ki ai 'i Nu'usila ni. Na'e fili leva e kau fakamâau 'a ia ko e kau tu'ukimu'a ia he mala'e 'o e musika´ 'i Nu'usila ni 'o nau folau takai 'i Nu'usila ni 'o faka'eke'eke mo filifili mai e kau tu'ukimu'a taha´ ki he fe'auhi ni mei he lauiafe na'a nau kanititeiti´.

Na'e 'uluaki fili e toko 60 mei he lauiafe ko 'eni´. 'I he ma'u e toko 60 ko 'eni´ ne nau fakakulupu leva 'o hiva ai kae toe fakamaau'i leva kinautolu 'e he kau fakamâau´. Ne toe tu'usi hifo leva e tokolahi e kau fe'auhi´ ki he toko 24. Na'e vahe 3 leva e toko 24 ko 'eni´ 'o nau tautau toko 8 he kulupu 'o nau hiva tahataha he TV kae fili 'e he kakai 'o Nu'usila´ kohai 'a e toko 3 tu'ukimu'a taha kenau kau ki he toko 10 tu'ukimu'a taha´.

'I he kulupu hono 2 'a ia na'e fakahoko ia he po Sapate´ na'e kau ki ai 'a Dave 'Otuhouma. Ko e fe'auhi ni na'e malie 'aupito he ko e tu'u 'a e hiva 'a e fo'i toko 8 he kulupu ni ne laka taha 'a Dave he 'ai ai e ma'a hono le'o´ ka ne toe mata kakai pea tonu mo e fasi na'a ne fili´ 'a ia ko e The Carpenters, Yesterday Once More.

Ko e malie e fili ko 'eni´ 'oku fai ia 'e he kakai´ 'a ia kapau 'oku te sai'ia ha taha te te lava pe 'o fili ma'ae tokotaha ko ia´ 'aki ha'ate Text pe 'oatu ha fekau 'i he telefoni to'oto'o´ (Mobile) pe ko ha'ate telefoni. Ko e Text mo e telefoni´ 'oku totongi ia 'o seniti 'e 99 tanaki ki ai mo e tukuhau´.

Neongo e sai 'a Dave ka na'e tokolahi ange e fili ia ki he ongo tangata kehe 'a ia ko Luke mo Michael kae toki fika 3 hake 'a Dave.

Ka e maloo ko 'eni 'oku hu atu 'a Dave 'o kau ki he toko 10 tu'ukimu'a taha´ pea mo'oni e lau 'oku pehê ko e fili mei he mata e afe´ pea 'oku lahi 'aupito hono faingamâlie ke ne hoko ko e fuofua NZ Idol.

Ko e tu'u he taimi ni 'oku mahino e toko 6 pea 'oku toe 'a e toko 4. Ko e kulupu fakamuimui´ 'a ia ko e toko 8 tenau fe'auhi nautolu he po Sapate´ pe kohai 'a e toko 3 'e hu ki he toko 10 tu'ukimu'a taha´. 'E hili ia 'e fili mai leva e toko 1 meia kinautolu na'e too he fili´ ke toko 10 'aki.

Kaekehe ko e fe'auhi ko ia he po Sapate ko 'eni´ 'oku kau ki ai e finemui Tonga ta'u 17 mei Mangere ko Sela Mahe. Na'e fai e fetu'utaki 'a e nusipepa ni ki he famili 'o Sela´ ka na'e 'ikai ke loto e famili ni ia ke 'ai ha'anau lau.

Kaekehe 'i he fe'auhi 'a e Australian Idol na'e ikuna ia 'e he talavou ko Guy Sebastian pea ko e taha 'ene fo'i hiva´ ko e Angels brought me here na'e meimei uike 'e 2 'ene tu'ukimu'a taha 'i Nu'usila ni hono manakoa´. Ko e taha hono pale´ ko hono hiki 'ene fo'i 'alapama ko e Just as I am 'a ia 'oku 'i ai ha fo'i hiva 'e 12 'a e talavou ni pea kuo laui miliona e pa'anga kuo tanaki he tuku atu e fo'i 'alapama ni he ne tu'ukimu'a ia 'i 'Aositelelia pea mo Nu'usila ni foki.

Ko e pale tatau 'e fai ki he fuofua NZ Idol 'a ia 'e lava pe ke milionea he me'a ni pea toe manakoa foki. 'Ikai ke ngata ai´ ka ko e ava 'eni 'a e matapaa kiate ia ke ne fakafekiki he mala'e 'o e musika´ mo hono maketi´.