Tu'u e vakapuna Royal Tongan

Na'e mei laka hake he uike 'e taha´ 'a e tau pe 'a e vakapuna Royal Tongan Airlines 'i he mala'e vakapuna 'Okalani´ pea to takai 'aki e kouni.

Na'e 'uluaki mafola holo e talanoa ia 'o pehee 'oku 'ikai ha 'utu he tokua 'oku fiema'u ke 'uluaki totongi kakato e 'utu´ ia kimu'a kae toki 'utu.

Ka 'i he fetu'utaki telefoni 'a e nusipepa ni ki he kautaha Royal Tongan na'e fakahâ mai ai 'e toki kamata puna e vaka´ he Tokonaki ko 'eni´ pea ko e 'uhinga e tu'u 'a e vaka´ ko e maumau fakamakenika ia.

Na'e fai e kole ke fai mu'a ha lea ki he pule lahi´, Logan Apppu ka na'e fakahâ mai 'oku mo'ua 'a Apppu ia he fakataha kae tukuange e fika telefoni´ ke toki fetu'utaki mai. Ka ne a'u 'o 'ave e pepa ni 'o paaki´ 'oku te'eki pe ke fetu'utaki mai 'a Logan ia.

Na'e tokolahi e kakai na'a nau 'osi puka 'enau folau´ he kautaha ni ka koe'uhi´ ko 'ene maumau´ ne pau ai ke fetongi 'enau puna´ ki he ngaahi vaka kehe´.

'Oku kei maumau foki mo e vakapuna fakalotofonua ia he vaha'a 'o Tonga , 'Eua mo e ongo Niua´.