Holo'aki e peseti 'e 64 e fea 'a e 'Ea Nu'usila´ ki Tonga´
Fa'u 'e 'Ulu'alo Po 'uhila

KUO tuku atu 'e he kautaha vakapuna lahitaha 'oku ne faifatongia ki he 'otu motu Pasifiki´ 'a 'enau totongi ma'ama'a faufaua ki he 'otu motu´ 'o kau ai 'a Tonga . Ko e ongoongo lelei 'eni ki he kainga Tonga´ ka ko e ongoongo fakamamahi ki he kautaha vakapuna fakafonua 'a Tonga´, Royal Tongan he kuopau ke 'unu mo 'enau totongi´ ki lalo ke fe'auhi mo e fu'u kautaha lahi ko 'eni´.

Kaekehe kuo fakasitepu 'e he 'Ea Nu'usila´ 'enau totongi´ pea ko e ma'ama'a taha´ ki Tonga ko e $199 ki he fo'i 'alu 'e taha mei 'Okalani ki Tonga´ (Oneway). 'E toki tanaki atu ki ai 'a e tukuhau´ ko e $8 mo e totongi ngâue´ ko e $25. Pea ka totongi 'alu mo e ha'u 'e fe'unga pe mo e $464. Ko e fea ko 'eni´ fakatatau ki he fakamatala mei he kautaha´ 'oku 'ikai ke fakangatangata e taimi´ 'o hangê ko ia ke pehê ko e weekend fare mo e hâ fua. Ko e fea pe 'eni ki he vaha'a taimi 'oku si'i ai e fepuna'aki 'a e kakai´ (low season). 'A ia 'e lava ke puka atu he taimi ni ka 'e toki kamata e fepuna'aki´ 'i he 'aho 20 'o Mee.

Ko e fa'ahinga kalasi totongi 'e 4 'a ia 'oku ui ko e Pacific Smart Saver, Pacific Flexi Saver, Pacific Fully Flexi pea mo e Pacific Business Class. Ko e ngaahi fea kotoa ko 'eni´ 'oku nau holo kotoa 'o a'u ki he peseti 'e 50.

Ko e Pacific Smart Saver 'a e fea ma'ama'a taha´ 'a ia oku $199 e fo'i 'alu 'e taha´. Ka 'oku 'i ai hono ngaahi tu'utu'uni 'a ia ko e vaka kotoa pe ki Tonga 'oku fakafuofua ko e peseti 'e 35 e 'uu sea´ 'e ma'u ia 'e kinautolu 'oku nau 'alu he fea ko 'eni´. Ko e totongi ko ia he Smart Saver ko ho'o puka pe ho'o tikite´ kuopau ke totongi leva ia 'i loto he houa 'e 24 ka 'ikai 'e ta'e'aonga ia pea 'oku 'ikai ke toe lava hano fakafoki e pa'anga totongi ia ko ia´ hili ho'o totongi´. Pea 'oku 'ikai ha lau poini ia he fa'ahinga fea ko 'eni´ (air points). Pea ko e fea ko ia´ 'oku taha pe ki he taha.

'E hu mâlie mai e totongi fo'ou ko 'eni´ 'o fe'unga ia mo e taimi konifelenisi 'a Tonga´ pea pehê ki he uike Heilala´ mo e ngaahi taimi uouó ko ia 'i Tonga´.

'Oku toe holoki foki 'e he kautaha ni mo 'enau totongi 'i he vaha'a 'o 'Aositelelia mo Tonga´ 'a ia 'oku $349 e 'alu atú 'a ia 'oku ne holo'aki e peseti 'e 28 mei he totongi anga maheni´. Ko e totongi mei Tonga ki Nu'usila´ ni 'oku $270 Tonga e ha'u´ pe. 'Oku tupu 'eni mei he ma'ulalo ange e mahu'inga e pa'anga Tonga´.

Neongo e ngaahi totongi ma'ama'a ko 'eni´ 'e kei hoko atu pe e ngaahi sevesi angamaheni he vaka´ hangê ko e kai´ mo e inu´.

'I he lea 'a e pule lahi ki he va'a fakatau tikite ki he Pasifiki´, Roger Poulton na'a ne pehê ko e faka'amu pe 'eni 'a e kautaha´ ke tukuhifo e totongi ki he 'otu motu Pasifiki´ ke lava ke fakalotolahi'i e kakai´ kenau 'a'ahi mo toutou puna he kautaha´ koe'uhi´ ko 'ene ma'ama'a´. Na'a nau 'uluaki tokanga ki he fepuna'aki fakalotofonua´ mo e fepuna'aki he vaha'a 'o Nu'usila mo 'Aositelelia´. Pea kuo lava ia ko 'eni 'oku nau hanga atu leva ki he 'otu motu Pasifiki´.

Na'e pehê 'e Poulton ko e 'Ea Nu'usila´ kuo a'u 'o ta'u 'e 50 'ene faifatongia ki he 'otu motu Pasifiki´ pea 'oku nau palani ke kei hokohoko atu pe 'i ha taimi loloa 'aupito.

"Na'e lahi e fanga ki'i kautaha vakapuna ne nau hu mai 'o mau fe'auhi ki he 'otu motu´ pea ni'ihi kuo nau puli atu ka 'oku mau kei lele pe pea 'e 'alu ia 'i ha taimi loloa 'aupito," ko Poulton ia.

'I ha lea 'a Taito Philip Field 'i hono katoanga'i e fakahâ 'a e totongi fo'ou 'a e kautaha 'Ea Nu'usila´ na'a ne fakahâ ai koe ongoongo fakafiefia 'eni ki he kakai e 'otu motu´ ke lava kenau toutou 'a'ahi ki honau fonua tupu'anga´ 'i ha totongi matu'aki ma'ama'a 'aupito. Na'a ne fakamâlo'ia foki e 'Ea Nu'usila´ 'i he ngâue ko 'eni kuo nau fai ma'ae Pasifiki´.