'Ave hopo 'Alani Taione´ Fakamaau'anga Lahi´
fa'u 'e Mâteni Tapueluelu

NUKU'ALOFA: "ÂLANI Taione! 'Âlani Taione!" Ko hono ui ia 'e he 'Ofisa Polisi e Fakamaau'anga Polisi Nuku'alofa´ 'a e fuofua faka'iloa he lao nusipepa fo'ou´, 'a ia ne tali pê 'i tu'a mo e kakai´, ke kamata 'ene hopo fakamaau'eke'eke he pongipongi 'aneafi´. Tuai e kemo ne ngaue fakataha atu pê e faka'iloa´ mo e ni'ihi e kau poupou ki ai´ mo e kau fainusipepa´ ki loto fakamaau'anga.

Ko hono faka'ilo eni 'o 'Alani ki hono tufaki e nusipepa Taimi 'o Tonga´ 'i Tonga ta'ema'u ha laiseni 'a ia 'e ala tautea pa'anga ai ia 'o 'ikai toe laka hake he $10,000 pe ngâue pôpula 'ikai toe laka hake he ta'u 'e 1 pê ko hono hilifaki fakatou'osi e ongo tautea´.

Ne 'i ai e 'amanaki 'e to'o hake e ngaahi fakamo'oni kehekehe 'a e Talatalaaki´, 'Inisipêkita Mema Lâtû, ke fakamo'oni'i ki he Fakamaau Polisi´, Sâlesi Mafi, 'oku 'i ai e fakamo'oni fe'unga ke 'ave'aki e keisi´ ni ki he Fakamaau'anga Lahi´, 'o hangê ko ia 'oku anga ki ai e fakamaau'eke'eke´. Ka ne fili 'a 'Alani mo 'ene Fakafofonga Lao´, Sifa Tû'utafaiva, ke 'ave hangatonu 'ena hopo´ mei he Fakamaau'anga Polisi´ ki he Fakamaau'anga Lahi´ ta'etoe fai ha fakamaau'eke'eke.

Na'e toloi ai 'e Fakamaau Polisi Sâlesi Mafi 'a e hopo´ ni ki he 'aho 24 'o e mâhina ni´ 'a ia 'e toe hâ ai e faka'iloa´ 'i he Fakamaau'anga Polisi´ pê, pea te ne fili ai pê 'e fakamaau'i ia 'e he Fakamaau Lahi 'ata'atâ pe ko e Fakamaau Lahi mo e kau sula. Hili ia´ 'e fakahiki ai pê e hopo´ ki he Fakamaau'anga Lahi´ 'o faka'aho e taimi 'e fakahoko kakato ai´. Ko e ongo Fakamaau Lahi´ ko e ongo papâlangi.

Ka ko e toloi ko eni e hopo´ 'oku fakafo'ou ai e malu'i 'o 'Alani´ pea 'oku kei puke pê 'e he fakamaau'anga´ 'a 'ene paasipooti´.

Ko 'Alani´ foki 'oku nofo fonua 'i Nuusila pea na'e 'i he fakamaau'anga´ ai 'a e Sekelitali 2 'a e Talafekau Lahi Nu'usila´, Taulaai Mareko, ke ne vakai tonu ki he lele 'a e hopo´.

Na'e fakahâ 'e 'Alani ki he Taimi 'o Tonga´ hili e hopo´ 'oku lahi 'ene tokanga ke foki ki Nu'usila ki he'ene pisinisi kuo fuoloa 'ene mavahe mei ai talu 'ene tû'uta 'i Tonga he 'aho 12 'o e mâhina kuo 'osi´, pea 'e kole ki he fakamaau'anga´ ke foki he vaha'a taimi ko eni´ ka ne toki tuli mai 'a e hopo he 'aho 24.

'I he taimi tatau na'a´ ne fakamamafa'i 'ene fakamâlô ki he Pule'anga Nu'usila´ koe'uhi´ ko e poupou mo e tokoni 'oku nau 'oange ki ai he lolotonga´ ni.

"Ko e 'i heni e sekelitali 'a e Talafekau Lahi e fonua 'oku ou nofo ai´ 'oku ou ongo'i malu mo tokangaekina ai, pea 'oku ou 'ilo ko e ongogongo lelei eni ki he kakai kotoa 'oku nofo fonua Nu'usila´," ko e lau ia 'a 'Alani hili e hopo´.

'I hono faka'eke pe na'e tui 'e puke ia 'e he kau polisi´ na'a´ ne pehê 'ikai.

"Na'e 'ikai ke u tui au 'e puke au pea faka'ilo hangê ko eni´. He ko e lao ko eni´ ko e fo'i lao maumau lao pê ia!"

Na'e fakamatala pê e tangata´ ni ki he Taimi 'o Tonga´ mo e Matangi Tonga´ kae sio e ni'ihi 'o e kakai´ na'e 'i he fakamaau'anga´ he na'e fonu e hopo´ mo e kakai ne tali holo 'i tu'a´.

"'Oku 'i ai e kulupu kuo mau fokotu'u 'i Nu'usila ko e " Tonga ma'ae Fonua", pea 'oku mau mateuteu ke fakahâ homau loto´ ki he kau taki 'o e fonua´ fekau'aki mo e me'a 'oku taau mo lelei ma'ae kakai Tonga´ he 'oku mau kei 'ofa pê 'i Tonga .

"Ko e taha ia 'emau faka'amu´ ke tô ange ha minisitâ ki Nu'usila pea mau 'ilo ki ai, ka mau fakahâ homau loto´ he âkenga 'o e fonua tau'atâina´."

'I he lolotonga´ ni 'oku te'eki ke tali e laiseni 'a e Taimi 'o Tonga´, Kele'a´ mo e Matangi Tonga´.