Fuofua sikolasipi tekinikale 'a e toko ono ki 'Aositelêlia
Fa'u 'e Taina Kami Enoka

'E folau 'a e toko ono ki Melipoane, 'Aositelêlia, 'i ha polokalama sikolasipi 'a e R.E. Ross Trust Fellowship.

'Oku uike 'e 20 'a sikolasipi pea ko e ako 'oku fakahoko ia 'i he tafa'aki fakatekinikale. Ko e fuofua sikolasipi pehe ni kuo foaki 'i Tonga ni, pea 'e mavahe mei Tonga 'i he Mônite.

'Oku kau 'i he kau ma'u sikolasipi ko eni 'a Heleni Penitani mei he 'Apiako 'Ahopanilolo, Mele Molioni Fainga'a mei he Senitâ ki he Ako ki he Mo'ui 'a e Siasi Uesiliana, pea te na ako 'i he tafa'aki 'o e ngaahi me'atokoni. Ko William Tokotaha mei he Va'a Komiunitî 'a e Potungâue Ako mo Mele Vasitai 'Otukolo mei he Hôtele International Dateline te na ako ki he talitali kakai (hospitality culinary studies). Pea mo Sunia Fukofuka mei he Kolisi Piula mo Sitani 'Akolo mei he Kautaha Fetu'utaki 'o Tonga , te na ako ki he tafa'aki fakakomipiuta.

'I he mala'e talitali kakai mo ngaahi me'a tokoni, 'e fakahoko 'a e ako ko eni 'i he William Angliss Institute of TAFE, pea ki eh tafa'aki komipiuta, 'e fakahoko 'a e ako 'i he Holmsglen Institute of TAFE.

'I he lau 'a e Talafekau Lahi 'o 'Aositelêlia ki Tonga, Colin Hill, na'a ne pehê 'oku 'ikai ke fu'u 'ilo'i 'a e polokalama ako ko eni.

"Pea ko e founga eni 'e taha 'e lava ai ke toe 'iloa 'a e polokalama ako ko eni," ko e lau ia 'a Colin 'i he Pulelulu.

Na'e pehê 'e he sea 'o e Kômiti Fale'i 'a e R.E. Ross Trust Fellowship, Simi Silapelu 'i he Pulelulu, ko e polokalama ni 'oku ne tokoni ke toe fakalakalaka kimu'a 'a e 'ilo ngâue 'i he'enau ngaahi mala'e tâkitaha. Pea 'oku 'amanaki pe te nau foki mai ki Tonga 'o tokoni ki hono ako'i honau ngaahi ngâue.

Talu mei he ta'u 1987, mo e tokoni 'a e R.E. Ross Trust, ko e talâsiti ngâue 'ofa 'i 'Aositelêlia 'i he tafa'aki faka sikolasipi, pea kuo lava ke 'inasi ai 'a e kau faiako 'e toko 200 tupu mei he ngaahi fonua kehekehe 'o e Pasifiki, 'o kau ai 'a East Timor .

Na'e fokotu'u 'a e talâsiti 'i he pekia 'a Roy Edward Ross 'i he 1970 pea na'a ne 'amanaki 'e lava ke fokotu'u ai ha founga ke tokoni ki he kakai 'o e ngaahi fonua Pasifiki´ ke nau ako 'i 'Aositelêlia he polokalama ako fakavaha'apule'anga (International Training Programme).