Fokotu'u 'a e Kalapu Halafuoleva´

Ko 'ene tu'u 'a 'Okalani ni 'oku mei tofuhia 'a e ngaahi kolo kotoa pe he fokotu'u 'enau kalapu fakakolo mo e taumu'a ke tokoni ki honau kolo takitaha 'i Tonga .

Ko e fakamuimuitaha´ ko e Kalapu Halafuoleva´ 'a e kainga Veitongo´ 'a ia na'e toki fokotu'u pe he 'aho 2 'o Sanuali´ 'i Otara. Na'e faka'ilonga'i 'e he kainga´ 'a e fokotu'u 'o e kalapu ni he Tokonaki kuo 'osi´ 'aki ha'anau kai me'akai fakataha.

'I ha fepotalanoa'aki mo e tokoni Sekelitali 'a e kalapu´, Suli Papani na'a ne fakahâ ko e fakakaukau ni ko e fai pe ia 'e he ki'i fânau to'utupu pea koe tokolahi 'o kinautolu 'oku 'ikai kenau inu kava ka ne na'e vivili kiate kinautolu 'a e taumu'a ke fai ha ngâue ke tokoni ki honau kolo tupu'anga´.

Na'e pehee 'e Suli´ ko e taumu'a´ 'oku ua 'a ia ke tokoni ki he langa fakalakalaka honau kolo´ 'o kau ai e tokoni ki he vai fakakolo´ pea 'e lave fakalukufua ai 'a e kakai´. Ko e ua´ ke tokoni ki he to'utupu 'o e fonua´ 'i he foaki ha'anau sikolasipi ako mo tokoni'i e sipoti´.

'Oku palesiteni he kalapu ni 'a Vai 'Uluaki'ahoia pea tokoni ki ai 'a Hafoka Siale. sekelitali´ ko Felisiane Pule'anga pea tokoni 'a Suli. Ko e tauhi pa'anga´ ko Siua La'akulu tokoni ki ai 'a Lui Lahaina 'a ia ko hono 'api´ 'oku fakahoko ai e kalapu´ 'i he hala Dawson . Ko e angi´ leva ko Lihai Lui pea memipa kotoa ai e tangata'i fonua kotoa pe 'o Veitongo.

Na'e pehee 'e Suli 'oku nau fakaafe'i atu 'a e Veitongo kotoa pe 'oku te'eki kenau 'a'ahiange´ kenau o ange mo 'enau fakakaukau´ ke tanaki mai ki he fokotu'u ngâue langa fonua 'oku fai´.

'Oku tokolahi foki e kau inu kava Veitongo 'i loto 'Okalani´ ka 'oku nau inu kava holo pe he ngaahi kalapu kehekehe o kau ai 'a Kaufana.