Na'e vela 'a e fale 'oku tu'u 'i mui 'i he hotele Janfull International Dateline 'i he tafa'aki 'o e Pangikê Malu'í mo e Televisone OBN, 'i he hengihengi Falaité 'o fakafuofua ki he taimi 4 hengihengi.

'I he takai atu 'a e nusipepa ni 'i he konga kimu'a 'o e hotelé 'a ia 'oku tu'u ai 'a e hû'angá na'e 'i ai 'a e kau folau'eve'eva na'e nofo 'i he hotelé na'a nau sio tonu 'i he vela ko 'eni´ mei Fisi, 'Amelika mo Pilîtânia.

Ko e ni'ihi na'a nau nofo pe mo 'enau kato leta mo 'enau ngaahi naunau kehekehe 'i he ve'e hala Vuná pea mo e ni'ihi na'a nau kei tui pe honau vala mohé.

Na'e 'i ai e ngaahi ta'efiemâlie ki he sêvesi 'a e hôtele´ na'e 'ohake 'e he ni'ihi ko 'eni 'a ia na'a nau fakahâ 'oku lahi 'a e ngaahi naunau 'oku totonu ke ma'u 'e he hotelé ka na'e 'ikai ke mâau ia 'i he taimi na'e hoko ai 'a e velá.

'I he taimi na'e hoko ai 'a e velá na'e 'ikai ke 'i ai ha fa'ahinga alarm na'e tatangi ke fafangu 'aki kimautolu kae mâlô mo 'emau tukituki takai holo 'i he ngaahi loki mohe´ ke 'ilo 'oku 'i ai 'a e vela 'oku hoko.

'I he 'emau hû mai kitu'a´ na'e mate 'a e 'uhilá pea 'ikai ke 'i ai ha maama he sitepu 'i he fale fungavaka ua´ 'a ia na'e huufi 'i Siulai 'o e ta'u kuo 'osi.

"Na'e 'aluange 'a e taha 'o tukituki ange 'i he matapâ ka ne u pehê 'e au ia ko hono fafangu au ki he taimi na'u kole ange ki ai [wake-up call] tâ ko e vela´ ia," ko e lau ia 'a e tokotaha 'oku ne 'i Tonga ni ke faitâ'i 'a e ngaahi 'ata 'o Tonga ni ki he polokalama to'utupu 'a e Komiuniueli´, ko Alison Field mo Simon.

Ko e tokotaha pe na'a ne pehê na'e hangê ki ai na'a ne fanongo ki he tatangi 'a e alarm pea sio atu kitua'aa ki he vela´.

" Na'e mâfana 'aupito 'a e loki ne u 'i ai´ pea u sio ki he ulo mai 'a e afi´ mei tu'a," ko e lau ia 'a e tokotaha.

Fakakatatau ki he fakamatala 'a e ni'ihi na'a nau fanongo ki he kaikaila mei tu'a 'o nau fakavavevave ai kitu'a 'o nau toki 'ilo tâ ko e vela mo 'enau pehê na'e fu'u faka ilifia 'aupito..

'' Na'a mau hoha'a ki he fine'eiki ko Joyce Sewell, ta'u 75 mei Chepstow, 'Ingilani 'i he'ene feinga hifo 'i he sitepu´ 'i he fakapo'uli 'a ia na'e iku fua mai ia 'e he tokotaha 'o e kau folau'eve'eva´ ki he fungavaka 'i laló", ko e fakamatala ia 'a e tokotaha na'a ne tokoni'i 'a e fine'eiki ni.

Ko e tu'o ua eni 'a 'ene 'a'ahi mai ki Tonga ni mo hono hoa´ ko Roy , pea na'e 'i ai mo 'ena ngaahi ta'efiemâlie ki he sêvesi ki he ngaahi loki mohe´.

"Na'a ma puna houa 'e 15 mai mei 'Amelika pea na'a ma hela'ia ka 'i he'ema a'u mai ki he hôtele´ na'a ma tali houa 'e 3 ai pea toki ma'u homa loki," ko e fakahâ ia 'e Joyce mo ne pehê na'a ne 'ita 'o ngaahi'i 'a e kau ngâue pea na'a nau toki ngâue ki ai.

Fakatatau ki he fakamatala 'a e ni'ihi kehe 'o e kau folau'eve'eva´ na'e 'ikai ke 'i ai ha vai mo ha 'uhila 'i honau loki´ 'i he Tu'apulelulu´ kakato.

Kaekehe 'i he 'eke ki he pule 'o e hôtele´, Lucy Liu 'a e fakamole ki he fale na'e velá na'a ne pehê 'oku lolotonga fai 'a e feinga ke fakakato 'a e ngaahi fakamatala ki ai´ ka ko 'ene kakató pea toki tala ke 'ilo 'e he kakaí.

Fekau'aki mo e launga 'a e kau folau'eve'eva´ na'e 'ikai ha maama ki he taimi fakavavevave´ na'a ne pehê 'oku 'i ai e maama ki he taimi pehê ka ko e laine 'uhila ki ai´ na'e vela.

Ka na'e fai e fetu'utaki ki he tafa'aki ki he laine 'uhila 'a e kautaha Shoreline Communications Ltd, ke vakai pe na'a nau ma'u ha fa'ahinga lâunga fekau'aki mo ha laine 'uhila na'e vela pea na'e pehê 'i he 'efiafi Tu'apulelulu na'a nau ma'u e launga 'o pehê 'oku 'i ai e fiusi 'i he transformer na'e vela 'i he 7:30 pm, pea na'a nau 'osi ngâue ki ai.

Ka na'e lava ai ke fakapapau'i 'a e'ikai ke nau ma'u ha fa'ahinga lâunga felâve'i mo ha laine 'uhila na'e vela pea ko e maama fakavavevave 'oku fakafalala pe ki he "efficiency 'o e fale ko ia´".

Pea 'i he vakai atu ki ai 'a e lau ki hono 'ikai ke 'asi ange 'a e kau pule 'o e hôtele´ ke tokoni ki he kau nofo 'i he hôtele´, na'e pehê 'e Lucy 'oku 'i ai 'a e kau ngâue sekiuliti 'oku nau ngâue houa 'e 24 pea 'i ai mo e pule 'oku ne ngâue 'i he taimi po'uli.

Na'a ne fakapapau'i ai kuopau ke nau tui teunga 'i he taimi kakato 'a e ngâue.

" 'Oku mau nofo 'i hotele ni 'a kimautolu 'a e kau pule´ ka na'e 'ikai tui honau teunga´ pea ko e me'a ia na'e 'ikai ke 'ilo'i ai 'e he kau nofo heni´ pe kohai e pule," ko e lau ia 'a Lucy.