Ongoongo Nounou

Ta'ofi 'a Kolôliana mei he me'a faka'eiki

Kuo ta'ofi 'a e tama 'a e toko ua 'o Kuini Halaevalu Mata'aho ke 'oua na'a toe tu'u ange ki he ngaahi feitu'u 'oku fakahoko ai 'a e me'a faka'eiki 'o Nôpele Ma'atu Fatafehi 'Alaivahamama'o Tuku'aho.

'Oku pehê 'e he fakamatala´ ko e ta'ofi eni 'e he Tama Palêmia´, Pilinisi 'Ulukalala Lavaka Ata 'a hono tuofefine ko Kolôliana 'Otuangû Naufahu´ ke 'oua 'e toe tu'u ange ki he Falemate 'i Falemahaki Vaiola´, pehee ki he 'â pô 'i he Villa´ 'i he po Tûsite pe ko Palasi 'i ha fa'ahinga taimi, pe koe'uhî ko 'ene ngaahi lea ta'etaau na'a ne fai ki he ni'ihi 'o e fâmili´ 'i he fale mate´.

Ko Kolôliana´ ko e tama ia 'a Kaufo'ou mo Naufahu pea 'oku 'ikai ko ha toki ta'ofi eni. 'I he kâtoanga mali 'a 'Ahome'e mo Tangikina 'i he ta'u 2001, na'e ta'ofi ia ai ke 'oua na'a toe tu'u ange ki he talitali 'i Kolovai´.

Toe maumau e vaka puna Royal Tongan

Ko e uike eni hono tolu 'i he maumau 'a e vakapuna twin otter 'a e Royal Tongan Airlines pea 'oku 'ikai ai ke toe 'i ai ha vakapuna ki 'Eua mo e ongo Niua.

Ko e maumau 'a e vakapuna´ 'e 'i he uike 'e ono pea 'oku pehê 'oku lolotonga vakai'i 'a e vakapuna´ 'i Nu'usila 'i he sivi fakata'u.

Na'e toki 'osi pe 'i he mâhina kuo 'osi´ 'a hono fetongi 'a e mîsini 'o e vakapuna fakalotofonua Shorts 360, ka na'e iku 'o foki vakatahi mai ai 'a e ni'ihi ia 'o e kau pâsese® koe'uhi´ ko 'enau ta'efiemâlie ki he sêvesi 'a e kautaha´.

Pea neongo ko e me'a maheni pe 'a e lôloa ko eni ki he sivi fakata'u´, ka 'oku lahilahi pe 'a e ngâue 'oku fiema'u ki he vakapuna ni. 'Oku pehê ko e 'uhinga 'oku 'ikai ke 'omai ai ha vakapuna ke ne fetongi 'aki 'a e vakapuna 'oku maumau´, koe'uhi´ 'oku 'ikai ke 'i ai ha pa'anga ke fua 'aki 'a e fakamole ko ia´.

"Ko e palopalema ia 'oku hoko 'i hono 'ave 'a e silini´ ke ngaohi 'aki 'a e vakapuna fakalotofonua 'o ngâue'aki ia ki he me'a kehe´," ko e fakamatala ia 'a e tokotaha.

Tuku atu ki he CPU kole Kosilio Ongoongo 'a Tonga´

KUO 'osi paasi atu 'e he Sea 'o e Kosilio Ongoongo 'a Tonga´, Pesi Fonua, 'a e kole tohi ki he 'Iunioni e kau Faiongoongo 'o e Kominiueli´ (CPU) ke nau tokoni 'i he 'amanaki ke hopo'i ko ia 'e he Kosilio e kau Faiongoongo´ 'a e faitu'utu'uni 'a e pule'anga´ ki he foaki laiseni nusipepa´.

Ne fakahâ 'e Pesi Fonua ki he Taimi 'o Tonga´ he efiafi 'aneafi´, ko e me'a 'oku fiema'u 'e he Kosilio´ ke ne 'ilo'i´ pe na'e anga fêfê e fakamaau'i 'e he pule'anga´ 'a e nusipepa ke foaki 'ene laiseni´ mo e nusipepa ke 'oua 'e foaki ha'ane laiseni´.

'I he taimi tatau 'oku kei tu'ulâhoko ai pê hono hopo'i 'ona 'e he kau Fakafofonga e Kakai´ mo e ni'ihi e kakai´ 'a e pule'anga´ 'i hono liliu e Konisitûtone´.