$1.27 miliona pê meia Bogdonoff fakakata
fa'u 'e Mâteni Tapueluelu

MEI HE 'eke US$26 miliona ne fai 'e he Pa'anga Talifaki 'a Tonga´ ki he ni'ihi kae tautautefito ki he tangata fakakata 'a e Tu'i´, Jesse D. Bogdonoff, ko e pa'anga pê 'e $1.27 miliona 'e ngali ma'u 'e Tonga´.

Ko e keisi´ ni fakatatau ki he lêkooki hisitôlia 'o e hopo´ ni mei he Fakamaau'anga 'a 'Amelika´ na'e tâpuni ia 'e Fakamaau Martin J. Jenkins he 'aho 15 mâhina kuo 'osi´ hili e felotoi 'a e ongo faka'ahi´ ke fakalelei pê 'i tu'a.

Ko e keisi fika 3:02 -cv- 02654 eni 'a ia ne fuofua lâunga'i ai 'e he Pa'anga Talifaki 'a Tonga´ 'a J. D. Bogdonoff, Hershell Hiatt, Donald Kaplan, Millennioum Asset Management Servives Inc., Services International Corporation mo e Wellness Technologies Inc. he mole 'a e pa'anga 'e US$26 miliona 'a Tonga ne 'oange ke tokanga'i 'e Bogdonoff.

Na'e fuofua lâunga'i 'a e kau faka'iloa´  ni 'i he 'aho 3 Sune 2002 hili pê ia hono tâlanga'i 'i Fale Alea 'a e mole e Pa'anga Talifaki´ pea iku fakamâlôloo'i ai 'a e Minisitâ Lao´, Tevita Tupou mo e Minisitâ Ako´, Tûtoatasi Fakafanua ko e ongo mêmipa 'o e Kômiti Pa'anga Talifaki 'a Tonga´.

Ko e pa'anga eni 'a Tonga ne ma'u mei hono fakatau atu e paasipooti´ ki he kau Siaina´ 'i he 'amanaki ke fakafoki 'a Hong Kong mei Pilitânia ki Siaina Lahi he 1997. Ne 'i ai e ilifia 'i he kau Hong Kong 'e ni'ihi 'i he foki ki he pule fakakominiusi´. Kaekehe ko e fakamole ia ki he hopo ni 'oku lau kilu pe.