Toloi hopo 'a 'Alani
fa'u 'e Mateni Tapueluelu

NUKU'ALOFA: KUO toloi e hopo 'a 'Alani Taione´ mei 'aneafi ki he Pulelulu kaha'u´. Ko e hopo eni 'a 'Alani 'i hono faka'ilo ki hono tufa 'o e nusipepa Taimi 'o Tonga´ 'i mala'e vakapuna hili ia 'ene tû'uta mai mei Nu'usila.

Ne 'amanaki ke fakahoko e fuofua hopo 'i he lao fo'ou ki he nusipepa´ 'i he 'aho Pulelulu 'o e uike ni´ ka ko e 'aho ia ne telio ai e me'afakaeiki 'o Nôpele Mâ'atu´, 'a ia ne kakato ai e kau taki 'o e fonua´, Hou'eiki 'o Tonga , Ha'amoa mo Fisi´.

Kuo fakalôloa ai hono malu'i 'o 'Alani ki tu'a´ kae toki hâ he Fakamaau'anga Polisi´ he uike kaha'u´.

Na'e fakahâ 'e 'Alani ki he Taimi 'o Tonga´ 'aneafi 'oku mahu'inga ki ai e hopo´ ka 'oku ongo 'a e fuoloa 'ene mavahe mei hono fâmili´ 'i Nu'usila´ fakataha mo 'ene pisinisi 'oku fakalele ai´.

"'Oku 'i ai 'eku ngâue 'oku fakalele 'i Nu'usila pea 'oku ko Nu'usila´, 'oku pa'anga e me'a kotoa he 'aho ki he 'aho. Ko u faka'amu au ke fai mo fakahoko he vavetaha´ 'eku hopo´ kau foki ki he ngâue´. Kuo lahi e fetu'utaki mai ki ai´ pea ko e ngaahi me'a ia 'oku 'aonga pê ke u 'i ai."

Kaekehe, 'oku tapui foki 'e he kupu 10 (1) 'o e lao fo'ou ki he nusipepa´ ke tufa ha nusipepa muli 'i Tonga 'a ia 'oku pehê:

"10 (1) Kuo pau 'e 'ikai 'i ai ha taha te ne fakatau atu pe tufaki, pe hû mai ki he pe tauhi ke fakatau atu, pe tufaki ha nusipepa muli 'i he pule'anga´, tukukehe kapau 'oku lolotonga 'i ai ha laiseni kuo tali 'e he minisitaa´ 'i he lao´ ni."

'Oku kei fakahû foki e kole laiseni ia 'a e Taimi 'o Tonga´   ke tufaki 'i Tonga 'a e nusipepa´ ni.

'I he kupu si'i (6) 'o e kupu 10 ai pê, 'oku fakahâ ai 'e ala tautea ha taha 'oku´ne maumau'i 'a e kupu 10 (1) 'i 'olunga´ ki he $10,000 pe ko e ngâue pôpula 'i he vaha'a taimi 'o 'ikai toe laka hake he ta'u 'e taha´ pe ko e hilifaki fakatou'osi e ongo tautea´ ni.

'I he kupu si'i (7) 'o e kupu 10 ai pê 'oku tu'utu'uni ai, 'e lau 'e he lao´ ko hono ma'u ha taha mo ha tatau 'o ha nusipepa muli te'eki laiseni 'e laka hake he tatau 'e 12, 'oku lau ia 'e he lao´ na'e fakataumu'a ke tufaki, tukukehe 'oka toki fakahalaki 'i he fakamo'oni 'e he tokotaha tukuaki'i´.

Kuo lahi foki e ui kehekehe mei he ngaahi kautaha faiongoongo muli ke tukuange 'a 'Alani 'i he vavetaha´ he 'oku 'ikai ha maumau 'e hoko hono tufa ha pepa, ka ko hono toki lao'i 'e he pule'anga´.