Telio e me'afaka'eiki 'o Ma'atu´
Fa'u 'e Taina Kami-Enoka

Ko e fanauako e Kolisi Kuini Salote ‘oku nau to'o e ngaahi pale he me'afaka'eiki´ he fononga ki Mala'ekula´.

Na'e fakahoko 'a e me'a faka'eiki 'o Nôpele Ma'atu, Fatafehi Alaivahamama'o Tuku'aho´ 'i Mala'e Kula 'i he Pulelulu´.

Na'e fai e takipoo´ 'i he Villa´, 'a ia ko e 'api ia 'oku me'a ai 'a Pilinisi Kalauni Tupouto'a 'i Mataki'eua´. 'I he 7 'o e efiafi Tûsite´, na'e fakahâ'ele 'a e pekia´ mei he Falemahaki Vaiola´, pea na'e fakahoko 'e he ngaahi siasi 'a e hiva fakafe'ao ki he takipoo´ 'e he ngaahi siasi kehekehe 'i Tongatapu. Na'e vahe fakahoua e failotu 'a e ngaahi siasi´ 'o lele pe ki he 'aho he po Tusite´.

Ko 'Eiki Lupepau'u Tuita na'a ne fahu 'i he pekia´ pea na'e me'a 'i Tonga ni 'a e ngaahi makapuna 'o e Tama Tu'i´, Taufa'âhau Tupou IV mo Kuini Halaevalu Mata'aho pea pehee mo e Fale 'o e Tu'ipelehake´.

Ko e fânau ako 'o e ngaahi kolisi´ na'a nau ta'utu 'i he hala ongo kauhala´ 'i he taimi 'o e fakahâ'ele´ 'i he efiafi Tûsite mo e pongipongi Pulelulu mei Vaiola ki he Villa.

'I he 9 pongipongi, na'e fakaha'ele mai e pekia´ ki he Holo Fakamanatu 'o Kuini Sâlote´, pea ko e kau ako 'a e Kolisi Sia'atoutai´ na'a nau to'o 'a e fata´ mei ai ki Mala'e Kula´.

Na'e fakahoko 'e he Palesiteni 'o e Siasi Uesiliana Tau'ataina 'o Tonga , Faifekau Toketâ 'Alifaleti Mone 'a e malanga'i 'o e me'afaka'eiki´ pea foaki mo e ngaahi pale 'a e fâmili´ mo e kau Fakafofonga Fakatiplômetika mei muli.

Na'e 'i Tonga ni mo e fâmili 'o e uitou´, 'Eiki Alaileula Tuku'aho mei Ha'amoa mo ha ni'ihi 'o e hou'eiki´ mei Fisi.

Ngaahi 'Ata mei he Me'afaka'eiki 'o Nopele Ma'atu