Fakaava 'a e va'a fo'ou 'o Langimalie 'i Glen Innes

NA'E fakaava 'a e va'a fo'ou e kiliniki Langimalie´ 'i he loto Shopping 'o Glen Innes 'i he 'aho 9 'o Fepueli´.

Fakatatau ki he fakamatala mei he kiliniki´ ni ko e 'uhinga hono fokotu'u e va'a fo'ou´ ni he 'oku ngali mama'o 'a Onehunga ki he 'alu 'a e kakai´ pea 'oku kau 'a Glen Innes 'i he feitu'u 'oku tokolahi ai e kau Tonga´.

Ko e va'a fo'ou´ ni 'oku taki ai 'a e neesi ko 'Ana Lolohea 'a ia 'oku ne taukei 'aupito he ngaahi mala'e kehekehe hangee ko e mahaki suka´ mo e mo'ui lelei 'a e kakai´.

'I he ngaahi mahina kuo maliu atu´ na'e fakahoko ai 'e he Sosaieti ki he mo'ui 'a e kakai Tonga´ ha ngaue pe savea he feitu'u ni 'i ha aleapau ngaue mo e Auckland District Health Board ke 'ilo pe ko e haa 'oku lahi pehee ai e mahaki kili´ (Cellulitis) he feitu'u ni. Na'e ngaue ki ai 'a Lee 'Ahokovi pea mo Taani Lavulavu 'o kau ai e vakai ki he tu'unga e ngaahi 'api´ pea pehee ki ha founga 'e fakasi'isi'i pe solova ai e mahaki ni.

'Oku ngaue he kiliniki ni ha toketaa mei Sri Lanka ko Manu 'a ia kuo laka hake he ta'u 'e 30 'ene ngaue fakatoketaa 'i Nu'usila ni. 'E toki 'a'ahi fakauike atu leva ki ai 'a Dr. Glennis Mafi pea pehee ki he toketaa ko Nani Aiono Le Tagaloa.

'Oku ngaue foki heni mo e neesi ko 'Elenoa Havea pea tali telefoni 'a Miss Soana 'Ali.