Tatala e pulonga 'o Hautaha

Na'e tatala e pulonga e fu'u fakatataa ko Hautaha´ 'i he Tokonaki kuo 'osi´ 'e he pulekolo 'o 'Okalani´, John Banks 'i he loto kolo 'o Onehunga´.

Ko e fu'u fakatataa ko 'eni´ ko e tisaini ia 'e he tufunga lalava Tonga ko ia ko Filipe Tohi ka 'oku ne nofo New Plymouth.

Ko e fakatataa ko 'eni´ 'oku tu'u ia 'i tu'a he fu'u Community Hall 'o Onehunga. Na'e fai foki e tohi tala ngaue ki heni 'a e kau 'aati 'iloa 'o Nu'usila ni pea ne ma'u ia 'e Filipe.

Ko e fo'i fakakaukau 'o e Haufataha´ na'e pehee 'e Filipe 'oku 'uhinga ia ki he fo'i afo pe 'e taha 'oku ne ha'i pe fakatahataha'i mai ha ngaahi va'a ki he fo'i hoko´.

Ko e ha'u 'eni mei he lea ko e Haukamature pe ko e haukamea´ 'i hono faka-Tonga´. 'Oku ne hanga leva 'o faka'uhinga'i e Hautaha´ ke hoko ia ko ha faka'ilonga 'o e fakatahataha mai 'a e ngaahi matakali kehekehe 'i he feitu'u Onehunga´ ki he senita honau komiuniti.

Na'e fakahoko hono lotu'i e 'aho´ 'e Faifekau Silivia Tongotongo pea hili ia´ na'e fakahoko 'e he to'utupu e kaingalotu Metotisi 'o Onehunga´ ha fakame'ite ki he kau fakaafe na'e 'i he 'aho´. Ne hili ia´ ne hoko atu ai pe ki ha talitali na'e fai 'i he holo fakakomiuniti.

Na'e fo'u e fu'u fakatataa´ ni 'e he kautaha ko e Terry Boon & Goldsmith Artitecture 'a ia ne fakafuofua e fakamole´ ki he pa'anga 'e fitumano tupu.

Ko Filipe foki 'oku 'iloa 'aupito ia 'i he Pasifiki´ mo mamani he 'aati´ pea ne fakakakala ia 'i Ha'amoa 'aki e hingoa Matai ko e Sopoilemalama koe'uhi´ ko kalasi kehe atu 'ene ngaue´.